Politika shqiptare është shfaqur e ndarë edhe në homazhet në ditën e dëshmorëve të Atdheut.
E ndërsa drejtues të institucioneve shtetërore dhe mazhorancës së majtë kanë zgjedhur që homazhet t’i bëjnë rreth orës 10:00, drejtuesit dhe përfaqësuesit e opozitës, do të nisin homazhet në orën 11:00.
Por ajo që ka rënë në sy gjatë homazheve të zhvilluara në Varrezat e Dëshmorëve, ka qenë mungesa e një komunikimi qoftë edhe formal mes Presidentit Ilir Meta dhe kryeministrit Edi Rama.
Pavarësisht se dy figurat më të larta të shtetit, së bashku me kryeparlamentarin Gramoz Ruçi, kanë qenë shumë pranë, ka munguar komunikimi, çka tregon edhe raportet që ekzistojnë mes Presidentit dhe kryeministrit.
Meta dhe Rama kanë qenë shumë pranë njëri-tjetrit, me çadra në duar, për shkak të reshjeve të shiut, por në asnjë moment ato nuk kanë shkëmbyer qoftë edhe një përshëndetje, madje kanë shmangur edhe përballjen me shikime.
