Kryeministri Edi Rama e ka cilësuar si një dezinformim dhe keqinformim mediatik dhe politik atë që ka ndodhur në Samitin e Berlinit, dy ditë më parë.
Në mbledhjen e grupit parlamentar socialist, Rama ka zgjedhur të informojë deputetët e PS-së lidhur me samitin informal, ku të ftuar të kancelares gjermane Angela Merkel dhe presidentit francez, Emmanuel Macron, ishin liderët e vendeve të Ballkanit Perëndimor.
“Nuk kisha parë kurrë më parë dezinformim, keqinformim më të madh mediatik dhe politik, sesa tërësia e marrëzirave dhe ligësive që u shoqëruan dhe pasuan në pasqyrat e mediave në Tiranë dhe Prishtinë.
Samiti nuk kishte asnjë lidhje me negociatat, asnjë samit për integrimin e Ballkanit perëndimor.
Gramafonët që lajmëruan kobin e zi të mbylljes së negociatave, pa mbaruar ne as kafet e mirëseardhjes, ishin një shprehje ekstreme e dëshpërimit të atyre që duan të marrin me vete vendi në rrugën e theqafjes politik që e kanë zgjedhur vetë.
Nuk shkova në takim për vendimin në zyrën e kancelares, se ajo nuk e thotë kurrë fjalën e fundit të parën, pa dalë raporti”, ka thënë Rama, para deputetëve të PS-së.
Në këtë mënyrë, kryeministri ka zgjedhur të akuzojë mediat shqiptare lidhur me astë çka ndodhi në Berlin, edhe pse kreut të qeverisë shqiptare i është bërë e qartë se nuk do të ketë hapje negociatash për Shqipërinë. Gjithsesi duke shmangur përgjegjësitë për atë çka ndodhi dhe që pritet, Rama ka zgjedhur që të bëjë përgjegjëse mediat dhe opozitën.
Në fakt referuar deklarimeve të tij, Shqipërisë i janë hapur negociatat që 1 vit më parë, kur ishte i vetmi që e pohonte një gjë të tillë, ndërsa nga kancelaritë europiane, thuhej se vendimi do të merrej në qershor të 2019, në përputhje me plotësimin e kushteve dhe kritereve.
Nga 1 vit më parë, Shqipëria në vend që të bëjë progress, duket se ka bërë hapa pas, po të kihet parasysh vendimi i parlamentit holandez që kërkon rikthimin e vizave për shqiptarët, për shkak të krimit dhe mosndëshkueshmërisë së tij.
