Partia Socialiste do të mbledhë Asamblenë Kombëtare, ku pritet të përcaktohen kandidatët për kryetarë bashkie dhe këshilltarë bashkiakë, më datën 10 maj.
Në këtë mënyrë, socialistët kanë shmangur mbledhjen e forumit më të lartë vendimmarrës në ditën që opozita e bashkuar ka paralajmëruar mbajtjen e protestës, 11 maj.
Në mbledhjen me dyer të mbyllura të grupit parlamentar socialist, kryeministri Edi Rama ka kërkuar nga deputetët që të mos influencojnë në përzgjedhjen e kandidatëve.
Gjithashtu, Rama kërkoi nga deputetët që të mos influencojnë për përfshirjen në listat e kandidatëve për këshilltarë të të afërmve të tyre apo miqve.
Deri më tani pothuajse të gjitha Asambletë e PS-së, sipas degëve, kanë depozituar në selinë qendrore të socialistëve në Tiranë, propozimet për kandidatët për kryetarë të bashkive.
Nuk dihet nëse këto propozime do të merren parasysh, apo do të ketë emra surprizë në garën, e cila pritet të përmbyllet nga Asamblea Kombëtare rreth 1 javë më pas.
