Astrit Patozi, drejtues i partisë “Bindja Demokratike” e ka cilësuar si qesharak koalicionin e ndërtuar nga PS me rreth 21 subjekte.
Madje, Patozi në postimin e tij, e cilëson koalicionin e Rilindjes edhe më qesharak se atë të disa partive në opozitë, që sipas tij, i kanë dhënë fjalën njëra-tjetrës të mos hyjnë në zgjedhje.
“Ne nuk duam që t’i japim kaq rëndësi vetes, por e gjitha kjo ngjan sikur në këto zgjedhje të dy palët kanë kundërshtar apo armik, sipas rastit, vetëm Bindjen Demokratike”, shkruan Patozi.
Ky i fundit është akuzuar nga opozita se krijoi Bindjen me ndihmën e Ramës. Ndërkohë në ditët e fundit janë denoncuar dhjetra raste, ku firmat e depozituara në gjykatë kanë rezultuar false.
KQZ me votat e socialistëve pranoi të rezistojë Bindjen si subjekt pjesëmarrës në zgjedhjet e 30 qershorit, edhe pse nuk ka pasur një konfirmim ligjor lidhur me regjistrimin e kësaj partie.
Postimi i Astrit Patozit
Ky koalicioni i “Rilindjes” me njëzet e ca parti më të vogla për të garuar bashkë në zgjedhjet e 30 qershorit është disa herë me qesharak se koalicioni i disa partive në opozitë, që i kanë dhënë fjalën njëra tjetrës për të mos hyrë në zgjedhje.
Ne nuk duam që t’i japim kaq rëndësi vetes, por e gjitha kjo ngjan sikur në këto zgjedhje të dy palët kanë kundërshtar apo armik, sipas rastit, vetëm BINDJEN DEMOKRATIKE.
Ky Taulanti i Ramës që doli ta shpallte këtë fitore të “Rilindjes” duhet të mësojë dy gjëra:
E para, që zgjedhjet janë një çështje shumë serioze, me të cilën nuk mund të tallesh. Sepse duhet të kesh një minimum respekti për njerëzit që do të votojnë, qoftë edhe për ata që kanë vendosur të mos shkojnë në zgjedhje.
E dyta, ai duhet të mësojë se nuk mund të ketë rreth 21 parti, që i bashkohen “Rilindjes”, sepse kjo shprehje nuk përdoret, kur e di numrin e saktë, por vetëm atëherë kur nuk je i sigurtë se sa janë. Ne e dimë se ai nuk ka ndonjë konsideratë për shumë nga ato partitë që kanë vetëm kryetarin, por të mos e bëjë kaq baltë sikur edhe me numrin e tyre ka qejf të bëjë gallatë.
