Albana Vokshi, ish-deputete e PD-së, u shpreh sot gjatë një takimi me strukturat e kësaj partie në degën nr 7, se ne po rritemi, po shtohemi nga dita në ditë.
Vokshi tha se strukturat e PD-së po zgjerohen, sikundër po rifreskohen me të rinjtë dhe të rejat, jo vetëm në moshë, por qytetarë që po i bashkohen kësaj partie.
“Janë me qindra kërkesa të tjera që po verifikohen deri në procesin e anëtarësimit në të gjitha degët e PD-së.
Po rritemi çdo ditë, pasi po rritet besimi i qytetarëve në alternativën e PD-së dhe lidershipin e kësaj partie, Lulzim Basha.
Të gjithë qytetarët shqiptarë e njohin shumë mirë se kush është kryeministri Edi Rama, i cili ka damkën e kryemashtruesit dhe kryegënjeshtarit.
Por ai është kryeministri më autoritar, më arrogant, më i korruptuar dhe më jo transparent, sikundër është përkufizuar edhe nga Drejtori i Zërit të Amerikës.
Ndaj qytetarët shqiptarë, çdo ditë e më shumë po e braktisin Edi Ramën, ndaj qytetarët shqiptarë poi bashkohen PD-së, e cila shihet si e vetmja alternativë që ka bërë hapa madhorë në drejtim të rritjes ekonomike dhe sociale, por edhe hapat e mëdhenj dhe cilësorë të bërë në drejtim të integrimit të Shqipërisë në BE.
Në këto 6 vjet, Edi Rama jo vetëm që nuk ka shtyrë procesin e integrimit përpara, pork a bërë hapa pas”, tha Vokshi.
Sipas saj, 102 deputetë holandezë votuan për t’i rikthyer vizat shqiptarëve, ndërkohë që PD kur ishte në qeverisje, në vitin 2010, i garantoi qytetarëve shqiptarë që të lëvizin pa viza në hapësirën Schengen.
“Por rritja e krimit, rritja e pastrimit të parave, rritja e trafikut të qenieve njerëzore, mosndëshkueshmëria e qeveritarëve të korruptuar dhe lidhjeve të tyre kriminale, janë shkaqet pse Parlamenti holandez vendosi për rikthimin e vizave.
Dje në Berlin, Edi Ramës, iu tha hapur nga Presidenti Macron dhe kancelarja Merkel që s’ka hapje negociatash, dhe kjo lidhet drejtpërtdrejtë me mënyrën sesi ai ka keqqeverisur vendin në këto 6 vjet.
Sot është dita për të reaguar, për të larguar Edi Ramën si e keqja më e madhe e këtij vendi, pasi në të kundërt një ditë mund të zgjohemi në diktaturë”, tha Vokshi.
