Ditën e enjte sërisht opozita dhe qytetarë do të bllokojnë të paktën 5 akse rrugore, duke përsëritur brenda 1 jave për herë të dytë skenarin e mosbindjes civile.
Sikundër mësohet do të jenë sërisht të njëjtat akse rrugore që u mbajtën të bllokuara të enjtes e javës së shkuar, ndërsa ky pritet të jetë një tjetër paralajmërim ndaj kryeministrit Edi Rama.
Prej dorëzimit të mandateve të deputetëve, opozita e bashkuar, e drejtuar nga Partia Demokratike, ka vendosur si kusht të panegociueshëm dorëheqjen e Edi Ramës nga posti i kryeministrit.
Në mbledhjen e fundit të strukturave drejtuese të PD-së u vendos që të enjten të ketë bllokime të akseve rrugore, ndërsa protesta e madhe do të kulmojë më 11 maj.
Bllokimi i rrugëve pritet të zgjasë sërisht 60 minuta, ndërsa sikundër mësohet degët e PD-së në zonat ku do të zhvillohen protestat kanë nisur përgatitjet me strukturat dhe partitë aleate, për një pjesëmarrje sa më të madhe të qytetarëve.
Akset që pritet të bllokohen duke paralizuar tërësisht qarkullimin do të jenë ai në afërsi të Milotit, rrethrrotullimi i Plepave ne Durrës, sheshi Shqiponja në Tiranë, në Fier-Sheq dhe në Bradashesh-Elbasan.
Ndërkohë nuk dihet se ku do të jenë dhe si do të shpërndahen drejtues të partive opozitare, që do të qëndrojnë bashkë me qytetarët deri në përfundimin e protestës.
