Kryeministri Edi Rama, i shoqëruar nga ministri në detyrë i Punëve të Jashtme, Gent Cakaj dhe ministrja e Shtetit, Elisa Spiropali, patën një takim në Berlin me kancelaren gjermane, Angela Merkel.
Fillimisht, ministrat e Ramës e paraqitën takimin si një sukses, duke mos nguruar të postojnë në rrjetet sociale, opinione mbi atë që kishte ndodhur.
Ministri në detyrë i Punëve të Jashtme, Gent Cakaj, do të shkruante: “takimi me Kancelaren Angela Merkel konfirmoi edhe një herë mbështetjen absolute të Gjermanisë për çeljen e negociatave për anëtarësim të Shqipërisë në BE. Progresi i madh i Shqipërisë në 5 prioritetet kyçe, me theks të veçantë në reformën në drejtësi, merr vlerësimin më të lartë nga Gjermania. Shqipëria do të vazhdon të luaj rolin e saj të pazëvendësueshëm në stabilitetin rajonal dhe afirmimin e vlerave evropiane në Ballkanin Perendimor 🇦🇱🇩🇪🇪🇺! Shumë mirënjohës për përkushtimin e Kancelares Merkel ndaj Shqipërisë 🙏!”
Ndërkohë që Spiropali në një tjetër postim shkruan: “Ndaj me ju këtë foto nga takimi i Kryeministrit me Kancelaren Merkel të cilën pata fatin ta takoj dhe ta dëgjoj nga afër me interes të madh, shumë e mbresuar nga qartësia dhe njohuria e saj deri në detaje mbi situatën në Shqipëri dhe proceset në rajon”.
Pak minuta pas postimeve të dy ministrave shqiptarë, gjigandi gjerman Deutsche Welle, në rrjetin e saj poston “më pak se gjysmë orë kishte Merkel në takimin me Ramën para se në orën 17.00 të përshëndeste Presidentin Francez Macron.
Për Shqipërinë ka shumë rëndësi çelja e negociatave , por momentalisht kjo është e pasigurtë”.
Burime nga CDU/CSU i thanë DW-së vendimi i tyre do të shtyhet në shtator.
Të tre postimet në rrjet janë bërë në pak minuta. E ndërsa ato të shoqëruesve të Ramës janë në të njëjtën frymë, duke paraqitur gjithçka me shumë entuziazëm, DW duket se me informacionin e përcjellë ka ngritur shumë pikëpyetje, jo vetëm për kohën e pakët që i është referuar kryeministrit Rama, por edhe negociatat.
