Të shmangim konfliktin civil më 30 qershor. Alarmi është dhënë nga deputeti it ë ashtëquajturës ‘opozita e re’, Andi Përmeti, i cili i është bashkuar Bindjes Demokratike të drejtuar nga Astrit Patozi.
Përmeti morri mandatin e deputetit, duke qenë pjesë e listës shumëemërore të PD-së, ndërsa plotësoi vakancën e krijuar në Kuvend pas largimit të ligjvënësve të PD dhe LSI-së.
“Duhet të japim alarmin për të shmangur luftën civile, të gjithë kemi vendosur të jetojmë në këtë vend, të mbajmë familjet tona, është më e rëndësishme se çdo post çdo interes financiar, çdo mbajtje pozicioni ose pretendimi shmangia e një konflikti civil”, shprehet Përmeti.
Reagimi i tij vjen në një kohë kur opozita ka paralajmëruar se nuk do të lejojë mbajtjen e zgjedhjeve farsë të 30 qershorit, ndërsa nga Rilindja ka pasur kërcënime se kush do të pengojë procesin do të përballet me sanskionet ligjore, që parashikojnë burg.
Përmeti, tashmë i përket partisë Bindja Demokratike, e cila u regjistrua në KQZ si një prej subjekteve që do të marrin pjesë në zgjedhje, ndërsa kreu i Komisionit, Klement Zguri tha se kjo parti nuk plotësonte kushtet ligjore. Por me votat e 4 përfaqësuesve socialistë në KQZ, Bindjes iu hap drita jeshile për të marrë pjesë në zgjedhje.
Kreu i kësaj partie, Astrit Patozi, ka deklaruar se Bindja Demokratike do të jetë pjesë e procesit zgjedhor, duke shtuar se askush nuk ka të drejtën të pengojë shqiptarët të votojnë. Këto deklarime të Patozit janë interpretuar si në mbështetje të tezës së kryeministrit Edi Rama, i cili duket se po sponsorizon krijimin e një opozite të re për të legjitimuar një proces farsë zgjedhor.
DENONCO