Ish-ministri Damian Gjiknuri, emri i të cilit sipas opozitës është i përfshirë në dosjen 184, për manipulimin e votave në qarkun e Dibrës, do të drejtojë Komisionin e Reformës Zgjedhore në Parlamentin e Shqipërisë.
Bashkëkryetare e këtij komisioni është Rudina Hajdari, deputetja që nuk dorëzoi mandatin duke thyer vendimin politik të marrë nga PD.
Ngritja dhe përbërja e komisionit është votuar në seancën e sotme me 90 vota pro të ligjvënësve socialist dhe atyre të “opozitës së re”, ndërkohë që pati 1 abstenim dhe 1 votë kundër.
Komisioni ka në përbërjen e tij 12 anëtarë, nga 10 që ishte parashikuar.
Gjatë seancës plenare, Hajdari tha se në agjendën e komisionit do të jetë edhe diskutimi mbi ndryshimin e sistemit elektoral.
Ndërkohë që kushti i vetëm i paraqitur nga socialistët ishte ai për dhënien e mundësisë emigrantëve për të votuar.
