Qytetarët iu përgjigjën thirrjes së opozitës për të bllokuar akset rrugore kombëtare, formë proteste kjo e mosbindjes civile.
Nga ora 18:00 disa mijëra qytetarë bllokuan 5 akset kombëtare për 60 minuta, duke shfaqur në këtë mënyrë një tjetër formë proteste nga ato të zakonshmet para Kryeministrisë apo Kuvendit.
“Ne nuk pamë qytetarë të irrituar, përkundrazi ishin solidarë. Pamë shumë makina që kishin hapur krahun në anë të rrugës, duke treguar solidaritet.
Ky është një nga hapat që ka hedhur opozita, e do të ketë vazhdimësinë e saj. Gjithçka është në bazë të një strategjie dhe plani, që do të jetë i befasishëm. Pse? Sepse kryeministri është larguar gjithnjë sa herë ka pasur protesta dhe nuk ka tentuar të qëndrojë e të përballet me njerëzit.
Kjo tregon frikën që ka ai, ose s’do të përballet me opinionin mbi këtë situatë”, tha Monika Kryemadhi në studion e TCH.
Ajo tha se në të kaluarën, kryeministrat nuk janë larguar por kanë qëndruar në zyrat e tyre.
“Kjo është një zgjedhje e gabuar e Ramës, pasi një ditë ai do të përballet me njerëzit”, tha më tej kryetarja e LSI-së.
Kryemadhi tha se është çështje e Ramës nëse ikën apo nuk ikën, por “çdo ditë që ai qëndron, fati i tij bëhet gjithnjë e më i zi, meqë i ka qejf këto fallxhoret”.
