Leonard Olli, anëtar i Këshillit Bashkiak të Tiranës, mohoi zërat të cilët e cilësojnë “Bindjen Demokratike” një produkt të Sali Berishës apo Edi Ramës.
Në studion e Report TV, Olli tha se kjo tendencë për të përbaltur një lëvizje të re politike, vjen për shkak të frikës që kundërshtarët kanë përballë saj.
Anëtari i Bordit Drejtues të Bindja Demokratike, Leonard Olli, tha se Rama vazhdon të luajë rolin e Ali Komikut.
“Ai nuk është aty për të bërë gaztorin, se gaztorin Rama e luan për mrekulli. Çdo tendencë për të përbaltur një lëvizje të re është një frikë.
Ai do që në momentin e parë të krijojë atë situatën e dyshimeve. Populli shqiptar ka parë shumë film më diversantë dhe për fat të keq të gjithë kanë harruar që kemi bindjet tona.
Nuk ka se si të jemi një krijesë e Berishës sepse ne kemi qenë një zë kundër ndaj tij. Sondazhet e dhanë qartë se kush ishte orientimi i shqiptarëve në raport me bojkotin e zgjedhjeve. Me bojkotin bëhet një hap që bie ndesh me vullnetin e popullit. Rama nuk duhet të ishte kryeministër sot.
Zgjedhjet në Shqipëri kanë dy probleme madhore, financimi dhe transparenca e tyre. Reforma zgjedhore duhet të jetë një debat i madh për të gjitha shqiptarët. Nuk e di nëse në komisionin e Reformës Zgjedhore ka vëzhgues nga partitë e tjera. Unë do të sugjeroja që jo vetëm PD por çdo parti tjetër duhet të kishte ekspertët e vet në këtë tryezë”, u shpreh Olli.
