Astrit Patozi, drejtues i Bindjes Demokratike, forcës më të re politike, ka kërkuar mbështetjen e qytetarëve për të rrëzuar partitokracinë, pasi sipas tij, kjo ushqen autoritarizmin, korrupsionin, abuzimin me pushtetin, padrejtësinë dhe pabarazinë e frikshme para ligjit.
Ende pa u mbyllur regjistrimi mbi forcën politike, Patozi, ish-deputet dhe ish-nënkryetar i PD-së prej rreth 8 vjetësh, duket se ka nisur fushatën në rrjetet sociale për të siguruar mbështetjen.
Krijimi i kësaj force politike dhe paralajmërimi për regjistrimin e saj si pjesëmarrëse në zgjedhjet e dekretuara të 30 qershorit, është konsideruar si një veprim që i shërben kryeministrit Edi Rama.
Fillimisht u krijua idea se kjo forcë politike do të krijohej nga Rudina Hajdari dhe do të kishte në përbërjen e saj edhe ish-deputetin Patozi, porn ë fund rezultoi se forca do të drektohet nga Patozi, ndërsa deputetja Hajdari ka sqaruar se do t’i duhet pak kohë për të marrë një vendim nëse do të bashkohet ose jo me këtë parti.
Postimi i Astrit Patozit
VOTO PËR “BINDJEN” TËNDE!
Falenderime, mirënjohje dhe respekt për ata mijëra burra dhe gra nga e gjithë Shqipëria, që nëshkruan në kohë rekord, por edhe e mbështetën duke e uruar që në ditën e parë lindjen e “BINDJES DEMOKRATIKE”!
Ata janë themeluesit e saj të vërtetë, ndaj të cilëve do të ndjehemi të detyruar gjithmonë.
Koha do të tregojë shumë shpejt se ne bëmë gjënë e duhur në një kohë të vështirë për vendin, pasi krijuam BINDJEN se ishte çasti që të merrnim të gjitha përgjegjësitë tona.
Por deri atëherë, ne do të rendim me shpejtësi, duke ftuar të na bashkohet çdo qytetar që kërkon ndryshimin e kësaj gjendjeje dëshpëruese në Shqipëri për shkak të sistemit dhe qeverisjes së gabuar.
Ka ardhur momenti që secili prej nesh duhet të marrë një vendim për të dhënë një kontribut që ta rrëzojmë partitokracinë, sepse ajo ushqen autoritarizmin, korrupsionin, abuzimin me pushtetin, padrejtësinë dhe pabarazinë e frikshme para ligjit.
Është pikërisht koha që çdo shqiptar duhet të marrë këtë ftesë:
VOTO PËR “BINDJEN” TËNDE!
