Nga Boldnews.al
Rudina Hajdari pritet të shkarkohet nga pozicioni i kryetares së grupit kuvendor demokrat vetëm një javë pasi u zgjodh thuajse me unanimitet nga deputetët e listës së Partisë Demokratike, të cilët refuzuan bojkotin e Parlamentit.
Burime të afërta me deputetët e “opozitës së re” deklaruan për “Boldnews.al” se po bëhen përgatitjet formale për shkarkimin e Hajdarit nga drejtuese e grupit parlamentar, për shkak të qëndrimeve të dyshimta politike të saj.
Rudina Hajdari u shpall të Enjten e kaluar si drejtuese e grupit parlamentar demokrat. Por, vetëm dy ditë më pas, ajo u përfshi në debate me disa prej deputetëve të tjerë opozitarë, të cilët kundërshtuan pjesëmarrjen në formacionin e ri politik, “Bindja Demokratike”.
Në atë takim, Hajdari la të kuptohej se do të ishte ajo drejtuese e partisë së re opozitare. Deputetët e tjerë, të pranishëm në takim, u shprehën të dyzuar nëse ishte i nevojshëm krijimi i një partie të re apo duhet të qëndronin nën siglën të Partisë Demokratike, pavarësisht se linja zyrtare e opozitës reale nuk i konsideron më ata si pjesë të sajën.
Gjithësesi, dyzimi i deputetëve mori fund në momentin që u kristalizua skenari, në bazë të të cilit Rudina Hajdari dhe Astrit Patozi kishin vendosur që të krijonin “Bindjen Demokratike”, duke e konsideruar të mirëqenë faktin se deputetët opozitarë do të ishin pjesë integrale e formacionit të ri politik.
Deputetët e “opozitës së re” e kuptuan shumë shpejt që ata po përdoreshin nga Astrit Patozi, nëpërmjet Rudina Hajdarit. Për këtë arsye, si hap i parë për “legjitimitetin” e tyre, për sa mund të quhen politikisht legjitim, deputetët e “opozitës së re” pritet të ndërmarrin hapin e parë-shkarkimin e Rudina Hajdarit nga posti i kryetares së grupit parlamentar demokrat.
Është ende e paqartë se kush mund të jetë pasuesi i Hajdarit në atë pozicion. Gjithësesi, për shkak të numrit ende të vogël të deputetëve “opozitarë”, alternativat për kreun e ri të grupit nuk janë shumë të mëdha.
Ndërkohë që pritet formalizimi i këtyre lëvizjeve, Rudina Hajdari, edhe zyrtarisht mund t’i bashkohet Astrit Patozit. Deputetja Hajdari, me një gjuhë të paqartë, nëpërmjet një postimi në “Facebook”, nuk e pohoi, por as e mohoi përfshirjen e saj në “Bindjen Demokratike”.
