Nga Boldnews.al
Ndërsa kryeministri Edi Rama sot përgëzon policinë për arrestimin e katër të dyshuarve si pjesë mbështetëse e grabitësve të vërtetë të Aeroportit të Rinasit, historia se përgjegjësinë e kanë kinezët, po venitet. Ka një motiv, pas çdo kompanie të madhe aziatike, veçanërisht të miliarderëve kinezë, gjithnjë shihet Olsi Rama, vëllai i kryeministrit shqiptar.
Nganjëherë Olsi bën edhe gabime trashanike, që nën delirin e paprekshmërisë, doli hapur krah kompanisë kineze që fillimisht synoi të bënte të tijën një tender për zonën e lirë të Spitallës në një sipërfaqe prej 500 hektarësh, e cila do jepej për shfrytëzim për 99 vjet.
Qeveria shqiptare, në fundin e mandatit të parë shpalli fituese kompaninë kineze “Zhejiang Haiteng Investment Co” dhe “Bejing Dongrun Tongbao Technology Co”. Ministri i atëhershëm i Ekonomisë, Arben Ahmetaj, vendosi anullimin e tenderit.
“Oferta e tyre është skualifikuar për shkak të mangësive të shumta në dokumentet teknike dhe paraqitje dokumentash të panoterizuara”, tha Ahmetaj. Por Kryeministri Rama dha një tjetër version për anullimin e këtij tenderi. “Im vëlla shoqëroi drejt Kinës një biznesmen shqiptar që e ka shok fëminjërie. Por unë do them diçka këtu, meqenëse u përfol në media, unë i kam kërkuar Ministrit Arben Ahmetaj që të anulojë garën për këtë konçension”- u shpreh Rama.
Në këtë rast, u detyrua të tërhiqej, pasi dukshëm Olsi Rama kishte dorë drejtëpërdrejtë në këtë konçension, me një vlerë marramendëse mbi 100 milionë Euro, por gabimi i madh ishte se u shfaq në një foto me bosët kinezë, pas së cilës ishte edhe projekti i ri.
Ikën një, po vjen një tjetër. Ish-ministri i Financave Shkëlqim Cani u shkarkua nga kryeministri Rama për një arsye “thelbësore”.
Në histerizmin e PPP-ve, ish-ministri i financave Cani ia “shkurtoi ditët” postit që mbante pasi dyshohet se refuzoi ofertën e Ramës për t’i dhënë një kompanie koncesionare për një periudhë 10-vjeçare, sistemin teknologjik monitorimin dhe transmetimin e të dhënash për Tatimin mbi Vlerën e Shtuar, TVSH.
Ky projekt u la disi pezull. Kompania “M.POS Limited” me seli në Hong Kong, kishte partner lokal në Shqipëri një tjetër kompani e cila njihet për lidhje direkte të Olsi Ramës. Ndonëse tenderi nuk u nënshkrua, sërish me forma të tjera në ofrimin e teknologjisë së informacionit dhe shërbimit për çështje tatimore janë futur thellë në sistemin e tatimeve dhe doganave, duke vijuar biznesin normalisht.
Olsi nuk di vetëm të “bëjë tifo” në stadium…Po nganjëhërë pa dashje i bën “gjëman vëllait”. I “dashuruar” pas kinezëve, Aeroporti i Rinasit kaloi në një kontratë të dyshimtë nga gjermanët tek një kompani kineze. Grabitja e Aeroportit të Rinasit ishte ngjarja e rëndë që ngado të vërtitej ishte rënie e qeverisë para një toge me pesë persona të armatosur.
Dhe kur Ramës i prishet imazhi dhe virtualiteti, nuk pyet as për vëllanë Olsin, që këtë herë i prishi shumë punë me “çështjen e kinezëve”, që ai i ka fort përzemër. Para e madhe… Në fillim u anatemua kompania kineze TIA që ka nën administrim Aeroportin e Rinasit, pasi sipas ministrushëve të Ramës ata ishin përgjegjës për mungesën e sigurisë brenda aeroportit.
Në ditët e para pas ngjarjes së 9 prillit, ku u rrëmbyen rreth 10 milionë euro brenda avionit, qeveria “sulmoi Kinën”, madje lanë të kuptohej se do e prishnin kontratën me ta. Por sot çdo gjë është venitur, kinezët e Rinasit po vijojnë të qetë, ndoshta janë detyruar të paguajnë një haraç, aty ku duhet.., për shtimin e sigurisë…
Për të mos e rënduar për atë që nuk e ka, duhet pranuar se Olsi nuk ka nën “kontroll” vetëm kinezët e Medresesë, ata që shesin në dyqane dhe hipur mbi dumdume rroba të lira. Por “Kina motër” sot ofron parajsën e Ramajve…!
