Luigi Soreca, Ambasadori i BE-së në Tiranë, po zhvillon një takim me kreun demokrat Lulzim Basha, në selinë e Partisë Demokratike. Takimi realizohet disa orë përpara mbylljes së afatit të vendosur nga KQZ për regjistrimin e partive në zgjedhjet lokale të 30 qershorit.
Mendohet se tema e diskutimeve mes Bashës dhe Soreca është situate politika në vend, ndërsa sot opozita e bashkuar zyrtarizoi edhe një marrëveshje ku mes të tjerash angazhohet për mospjesëmarrjen në zgjedhje përsa kohë Edi Rama do të vijojë të jetë kryeministër. Gjithashtu partitë opozitare angazhohen për një aksion të ri opozitar lidhur me realizimin e kauzës së ngritur prej tyre mbi zgjedhjet e lira dhe të ndershme.
Nuk dihet nëse Soreca ka marrë rolin e një negociatori mes pozitës dhe opozitës, apo thjesht takimi në fjalë do të jetë informues mbi atë se çfarë opozita zyrtarizoi dhe mbi hapat e mëtejshëm që do të ndiqen.
Prej të enjtes, partitë e opozitës do të nisin protestat rajonale, ku pritet bllokimi i akseve rrugore, një formë kjo e mosbindjes civile.
