Në Ditën Ndërkombëtare të Tokës, Presidenti Ilir Meta, ka drejtuar një apel për t’i dhënë fund ndërtimeve pa kriter që kanë shkatërruar edhe kurorat e gjelbërta të qyteteve.
Apeli i Presidentit vjen në një kohë kur nga kryebashkiaku Erjon Veliaj janë firmosur ndërtime kullash në pothuajse çdo hapësirë të mbetur bosh, ndërsa në rrezik mbetet edhe Teatri Kombëtar dhe hapësira pas tij, për shkak të projektit që ka qeveria për ndërtimin e disa kullave.
Postimi i Ilir Metës
Për një të ardhme më të shëndetshme të fëmijëve tanë, është detyra jonë ta mbrojmë tokën, shtëpinë tonë të përbashkët, duke treguar një kujdes e vëmendje më të shtuar për mjedisin dhe ekosistemin, ruajtjen e biodiversitetit të pasur dhe pyjeve të bukura të Shqipërisë.
Mbrojtja e tokës dhe e mjedisit, nuk duhet trajtuar si propagandë mediatike! Të gjithë jemi dëshmitarë se si kurorat e gjelbërta, që duhet të ishin mushkëria e pacënueshme e qyteteve tona, fatkeqësisht janë dëmtuar nga ndërtimet pa kritere, një regres që duhet të marrë fund!
Ta bëjmë tokën një vend më të mirë për të jetuar!
Gëzuar Ditën Ndërkombëtare të Tokës
