Koni zbardh skenarin e shkarkimit/ Ja dekanët që bashkëpunojnë me Ramën kundër…

Rektori i Universitetit të Tiranës, Mynyr Koni, i ftuar në emisionin “Të Paekspozuarit”  ka folur rreth arsyeve që çuan në pezullimin e tij nga detyra nga ministrja e Arsimit.

Koni është shprehur se pas sulmit ndaj tij qëndron Dhori Kule, dekani i Fakultetit Ekonomik, dhe grupi i tij, në bashkëpunim me mazhorancën.

“Lufta e dekanëve që u shprehën në mbështetje të urdhrit të ministres së Arsimit, nuk ka filluar tani, por është shprehur qysh në muajin shkurt të vitit 2017.

Kur sapo ka qenë krijuar bordi i administrimit. Në shkurt të vitit 2017, ka filluar një shantazh i plotë, i organizuar nga persona të cilët kanë qenë ish drejtuesit e Universitetit të Tiranës, Dhori Kule, Ervin Demo, Edmond Rapti, Artan Hoxha.

Qëllimi i tyre ka qenë bllokimi i Universitetit të Tiranës, në të gjithë komponentët e funksionimit të tij, në mënyrë që të detyronin rektorin e Universitetit për të dhënë dorëheqjen. Unë, pavarësisht nga bllokimet nuk e kam bërë këtë veprim”, u shpreh Koni.

Ai shtoi se grupi i Dhori Kules, ka vepruar për interesa personale dhe kanë bashkëpunuar me institucione shtetërore, duke hedhur kështu një akuzë shumë të rëndë, se ka patur një komplot për largimin e tij nga mazhoranca aktuale.

LEXO EDHE  Minatorët në protestë para Kuvendit: Duam të drejtat tona!

“Fillimisht unë e kam lexuar si interesa personale të ish rektorit me grupin e tij. Në fillim kam menduar, se Kule e ka nga emocionet e lënies së detyrës. Mbi figurën time, kanë funksionuar disa agjensi dhe institucione shtetërore, duke u sinkronizuar me këta persona, për të rritur intensitetin e bllokimit të rektorit të Universitetit të Tiranës. Ky është një veprim pastër politik, një aleancë midis mazhorancës dhe grupit të ish drejtuesit të Universitetit të Tiranës”, deklaroi rektori i UT-së, Mynyr Koni.

Ditë më parë, ministrja e Arsimit dhe Sportit Besa Shahini pezulloi nga detyra rektorin e Universitetit të Tiranës, Mynyr Koni, ndërsa i kërkoi presidentit Ilir Meta shkarkimin e tij.

Pretendimi i MAS është hapja rugë reformës së domosdoshme në Universitetin e Tiranës