Kreu demokrat Lulzim Basha tha mbrëmjen e sotme se vendimi i marrë nga Parlamenti holandez për rikthimin e vizave për shqiptarët ka 3 domethënie.
Basha tha në emisionin Tempora se ky nuk është një akt racizmi për popullin shqiptar, por një akt mosbesimi ndaj qeverisë shqiptare.
“Prej 3 vitesh policia e Holandës ka evidentuar se rrjetet kriminale me bazë në Shqipëri kanë kryer krime, kanë futur në dorë rrjetet e trafikut të drogës nga Amerika Latine drejt Europës.
Te Holanda ka ndodhur kjo, që droga është një problem i madh për vendet e BE-së.
Grupet kriminale po paraqesin një rrezik të madh për pastrimin e parave në këtë vend, pasi janë fuqizuar shumë.
Kjo që ka ndodhur sot është shumë e rëndë. Sot po ndëshkohet Shqipëria për shkak të qeverisë shqiptare, e cila nuk i çon në burg kriminelët, por bëhen biznesmenë, kryebashkiakë apo futen në Parlament.
Nëse kemi Taulant Ballën me Edmond Begon në 57 udhëtime, nëse kemi Vangjush Dakon me bandën e Avdylajve në përgjime, atëherë kjo do të thotë se kemi një problem të madh me rrjetet kriminale”, tha Basha.
Sipas tij, sot Shqipëria po bëhet lavatriçe e krimit. “Kemi pyetur bankat dhe thonë se s’ka kredi për ndërtimet, por janë mënyra alternative, atëherë çfarë po ndodh, po pastrohen paratë”, tha Basha.
Sipas tij, një vend që kërkon rikthimin e vizave, s’ka shanse që të votojë për hapjen e negociatave.
