Kreu demokrat Lulzim Basha tha se marrëveshja me Edi Ramën nuk ekziston më. “Është humbje kohë të merresh me këtë paradigmë, ku duket se i vetmi që është i investuar është Edi Rama”, tha Basha.
Në emisionin “Tempora”, kreu demokrat theksoi se aksioni opozitar është në rritje. Lidhur me sondazhet e IPR, Basha tha se pavarësisht tendencave të majta të kësaj kompanie, sondazhet e nxjerrin opozitën shumicë.
“Gjendja e mediave është një nga arsyet kryesore që ne ndodhemi në këtë gjendje. E para është politika, e dyta është media dhe e treta është indiferenca e disa institucioneve ndërkombëtare”, tha Basha duke renditur arsyet sepse vendi ndodhet në këtë gjendje.
Basha tha se kauzat e opozitës tashmë janë vërtetur, duke filluar nga kriminelët në politike, te droga, rreziku për rikthimin e vizave dhe lidhjet e qeverisë me krimin.
“Kërkojmë vendosjen e rregullave që qytetarët të vendosin se cilën qeveri duan, dhe jo që krimi të zgjedhë qeverinë”, theksoi Basha.
Sipas tij, ka ardhur koha që ti jepet fund politikanëve dhe oligarkëve grabitqarë që kanë grabitur shqiptarët në këto 30 vite dhe janë pasuruar.
“Kemi sot një qeveri që ka ardhur në pushtet me krimin dhe po bashkëqeveris me krimin. Sot jemi në fazën që po kërkohet rikthimi i regjimit të vizave, ndërsa para 9 vitesh kur luftohej krimi, shqiptarëve iu hoqën vizat”, tha Basha, duke shtuar se jemi i vetmi vend në Ballkan që kërkohet të na rikthehen vizat për shkak të lidhjeve të qeverisë me krimin.
“Ne kemi zgjedhur një betejë misionare që prej ditës së parë. Kollaj do të ishte për ne të mbyllnim sytë para kanabisit, para kriminelëve në Parlament. Kriminelët te gardhi i PD-së rrinin, gati për të bërë paktin që bënë me PS-në, por e gjetën derën mbyllur dhe ja ku jemi sot”, tha Basha.
