Kryebashkiaku i Tiranës, Erjon Veliaj, ka vendosur të gjobisë Partinë Demokratike lidhur me protestën e djeshme të zhvilluar në Tiranë, ku një nga protestuesit, zgjodhi një mënyrë krejt të veçantë për të shprehur reagimin e tij kundër Kryeministrit Edi Rama, ndërsa urinoi në derën e godinës qeveritare.
Përmes një postimi në rrjet, Veliaj njofton se “PD gjobitet për të 5-ën herë për organizime të urinimit publik! Si dhe më parë, paratë do t’i merren direkt nga llogaria ! Imagjino ç’alternativë qeverisëse është një parti që i shpëton në brekë! Hipokrizia e “Mbro Teatrin” duket qartë tek ndërtesa e Gherardo Bosios”.
Ashtu sikundër e pranon edhe vetë Veliaj i ka vendosuir partisë më të madhe të opozitës 5 gjoba. Ndërkohë në rastet e mëparshme, drejtues të PD-së kanë ironizuar aktet administrative të firmosura nga policët e Lali Erit.
Kreu demokrat Lulzim Basha në rastin e një gjobe 163 milionëshe ka deklaruar se Erjon Veliajt do t’i çojnë një kastravec 163 mm.
Ndërsa nënkryetari i PD-së Edi Paloka për të njëjtën gjobë do të deklaronte “sa për gjobën, i thoni Erionit të sjellë mamin tek Partia Demokratike, se ajo merret me lekët”.
Nuk dihet nëse për gjobën e re ndaj PD-së, Veliajt i pëlqeu kastraveci që i çoi Basha, apo ftesa që iu bë nga Paloka. Ndoshta i kanë pëlqyer të dy opsionet.
