Opozita do të protestojë sot para godinës së Kryeministrisë, duke kërkuar largimin e Edi Ramës nga posti qeveritar.
Ndërkohë Rama nuk do të jetë në Shqipëri, ndërsa do të vijojë agjendën e takimeve jashtë vendit.
Prej të premtes, e gjithë zona rreth Kryeministrisë është rrethuar me kangjella, të cilat duket se përcaktojnë perimetrin e sigurisë. Menjëherë pas tyre vjen rrethimi i parë me policë, ndërsa në gadishmëri do të jenë trupat e FNSH-së dhe ato Shqiponja, që në varësi të situatës mund të ndërhyjnë.
Shtyllat pranë godinës së kryeministrisë janë lyer me graso, për të mos lejuar protestues të ndryshëm të ngjiten në to.
Protestuesit pritet të mblidhen në pika të ndryshme pranë qendrës së Tiranës për të marshuar më pas në bulevardin Dëshmorët e Kombit.
Qarkullimi i mjeteve në bulevardin kryesor të Tiranës do të bllokohet, dhe po kështu edhe në rrugët pranë zonës së Kryeministrisë dhe TVSH-së, ku sërisht mund të ketë përqëndrim të protestuesve.
Një prej skenarëve që mund të përdorë sot opozita është ai i rrethimit të kryeministrisë, në mënyrë simbolike me protestues që do të përqëndrohen në të gjitha anët e godinës qeveritare, për t’u mbledhur më pas në bulevardin “Dëshmorët e Kombit”.
Kjo është arsyeja që policia ka menduar të rrethojë të gjithë zonën me kangjella, që përbëjnë edhe perimetrin e sigurisë.
Ndërkohë që punonjës civilë të Policisë së Shtetit, ashtu si edhe në protestat e tjera të opozitës, mund të infiltrohen mes protestuesve.
