Ministrja e Mbrojtjes Olta Xhaçka i është përgjigjur në distancë Presidentit Ilir Meta, pasi ky i fundit kërkoi informacione mbi bazën ligjore të angazhimit të efektivëve të Policisë Ushtarake dhe batalionit Special të FA në perimetrin e sigurisë së aeroportit “Nënë Tereza”.
Xhaçka në një prononcim tha se nuk ka asnjë arsye që për vendimin në fjalë të njoftohej Presidenti, pasi ne nuk po shkojmë në luftë dhe nuk ka cënim të sigurisë kombëtare.
“Është praktikë që është bërë në shumë vende të tjera. Ky nuk është precedent i padëgjuar ndonjëherë por i përsëritur që na detyron të marrim përsipër për të garantuar sigurinë e qytetarëve, në radhë të parë.
Pothuajse gjysma e infrastrukturës është ushtarake dhe jemi të detyruar të garantojmë perimetrin e sigurisë së aeroportit dhe policia ushtarake e ka për detyrë. Do i japim përgjigje të gjithëve atyre që mesa duket nuk e njohin ligjin”, tha Xhaçka.
