Ish-ministrja e Arsimit Lindita Nikolla ka fituar gjyqin me ish-deputetin demokrat Luçiano Boçi. Gjykata vendosi gjobitjen e Boçit me 70 mijë lekë, duke dënuar në këtë mënyrë ish-deputetin me akuzën e shpifjes dhe fyerjes.
Përplasja mes Boçit dhe Nikollës lindi pasi ish-deputeti akuzoi ministren për korrupsion lidhur me tenderin e dëftesave.
Më 13 korrik 2018, Boçi reagoi lidhur me situatën e krijuar në atë kohë kur 420 mijë nxënës shqiptarë për herë të parë mbetën pa dëftesat shkollore. Të vetmet dëftesa që u printuan dhe u shpërndanë ishin ato të klasës së 9-të, por edhe ato rezultuan me gabime, çka e bën dëftesën dokument të pavlefshëm për 35 mijë nxënës. Ky denoncim u bë nga Luçiano Boçi, i cili bëri përgjegjës për këtë rekord të ri, ministren Lindita Nikolla, që e akuzon për papërgjegjshmëri, paaftësi dhe korrupsion.
Pas deklaratës së Boçit reagoi Nikolla, duke u shprehur se nuk ka dëftesa me gabime dhe as vonesa.
Nikolla ka kërkuar që Partia Demokratike të bëjë të ditur faktet dhe jo gënjeshtrat e shpifjet. Por nga ana tjetër ministrja ka thënë se do të shkojë në prokurori për shpifjet e bëra nga Luciano Boçi.
