Një ditë më parë, Presidenti Ilir Meta u shfaq në një market duke blerë produkte. Pak a shumë Meta ishte kujdesur të kopjonte kancelaren gjermane, Angela Merkel, ndërsa shfaqej në foto i veshur sportive dhe pa praninë e truprojave.
Sot në mëngjes, Meta ka zgjedhur të shkojë në Durrës dhe të konsumojë një kafe, në një prej lokaleve të qytetit me gazetarin Bashkim Hoxha.
Edhe këtu është kujdesur të shfaqet pa truprojat në sfond.
“Mirëmëngjes nga Durrësi! Kënaqësi ta nis ditën me gazetarin e shquar, Bashkim Hoxha”, shkruan Meta, ndërsa poston foton në rrjet.
Duket se Presidenti ka zgjedhur një mënyrë për të sfiduar kryeministrin Edi Rama, i cili kudo që shfaqet ka të paktën 4 truproja. Kjo ndodhi edhe gjatë parakalimit në 10 vjetorin e anëtarësimit të Shqipërisë në NATO, ku pavarësisht se rrethohej nga Forcat e Armatosura, Rama ndiqej nga afër edhe nga truprojat e tij.
