Nga Boldnews.al
Shefi i Prokurorisë së Shkodrës, Ylli Pjetërnikaj dështoi sërish me atë që u konsiderua “super-operacioni” i fajdeve. Gjashtë nga 12 të arrestuarit me bujë të madhe, u liruan të Mërkurën nga Gjykata e Apelit të Shkodrës, pasi provat e siguruar nga Prokuroria nuk ishin bindëse që ata të qëndronin në qeli.
Operacioni “anti-fajde” në Shkodër, i zhvilluar rreth dy javë më parë, ishte më shumë një shoë prokurori-politikë për të dëshmuar se shteti është i fortë në kryeqendrën e Veriut. Për këtë “operacion” të drejtuar nga vetë “Ylli” i Arta Markut, dhanë lavdërimet e tyre edhe kryeministri Edi Rama, ministri i Brendshëm Sandër Lleshaj e të tjerë zyrtarë të lartë qeveritarë.
I gjithë ky shoë, siç u kuptua qartë nga qytetarët shkodranë, ishte një formë për të fshehur dështimin me mos-zbulimin e autorëve të një serie vrasjesh mafioze në qytet.
Këtë e shprehu edhe avokati i një prej të arrestuarve, vetëm një ditë pas operacionit ‘spektakolar”. Sipas tij, “arrestimet janë kryer vetëm për t’i bërë qejfin qeverisë dhe Edi Ramës”.
E, në fakt, kështu rezultoi. “Show” i drejtuar nga Pjetërnikaj u sfumua këtë të Mërkurë. Gjykata e Apelit nuk gjeti asnjë provë bindëse për të mbajtur në paraburgim gjysmën e të arrestuarve, ashtu siç e paralajmëroi “Boldnews.al” në një shkrim të mëparshëm.
Në bazë të atyre që Policia dhe Prokuroria i konsiderojnë “prova”, rezulton që disa persona u kanë dhënë hua me fajde djemve të ish-prefektit të Shkodrës, Paulin Radovani. Po sipas “provave” të institucioneve ligjzbatuese, kjo veprimtari përbën vepër penale, pasi huaja e dhënë është me norma të larta interesi.
Por, e gjithë skema e ngritur nga Prokuroria rezulton, në fakt, në kundërshtim me një vendim të Kolegjeve të Bashkuara të Gjykatës së Lartë, e cila e ka sqaruar në mënyrë të plotë dhe të qartë raportet civile ndërmjet huadhënësve e huamarrësve.
Ylli Pjetërnika, i cili u konsiderua si “gjetje” e Kryeprokurores së Përkohshme Arta Marku, një ish-student Magjistrature, duket se ka dështuar në këtë rast në atë pjesë ku ai e ndjen veten më të fortë-në teori.
Pjetërnika, si jurist, e ka të qartë që vendimi i Kolegjeve të Bashkuara është i detyrueshëm për të gjithë instancat e drejtësisë në nivelet më të ulta.
Në vendimin nr. 932, dt. 22.06.2000, Kolegjet e Bashkuara shprehen:”…Kodi ynë Civil nuk ka përcaktuar ndonjë kufi maksimal të kamatave të lejuara, siç parashikojnë legjislacione të vendeve të tjera. Ai ka pranuar parimin e lirisë së plotë të kontraktimit dhe të konkurencës sipas rregullave të tregut…”.
Po në të njëjtin vendim, Kolegjet e Bashkuara të Gjykatës së Lartë, theksojnë: “….Në çdo rast, në një kontratë huaje, huadhënesi nuk ka të drejtë të ndërhyjë në mënyrën se si i administron apo i përdor huamarrësi paratë e marra hua. Në këtë kontratë, huadhënësi ka të drejtë të kërkojë vetëm kthimin e shumës së dhënë hua, si dhe kamatat e stipuluara, në qoftë se huamarrësi e ka marrë përsipër një detyrim të tillë. Reziqet eventuale, që rrjedhin nga administrimi i shumës së marrë hua, nga investimi i saj, apo nga kryerja prej huamarrësit me këtë shumë e veprimeve të tjera juridike me qëllim rritjen e fitimeve, rëndojnë kurdoherë mbi huamarrësin”.
Ky vendim i Kolegjeve të Bashkuara të vitit 2000 ka thuajse të njëjtët elementë me atë që “Ylli” i Arta Markut e konsideroi gjatë dy javëve të fundit si “zbulim” të jetës së tij profesionale.
Ylli Pjetërnikaj dhe Arta Marku së bashku, para se të zbatojnë “porositë” e kryeministrit, është e rëndësishme të lexojnë jurisprudencën, pasi në fund edhe vetë dështojnë, edhe udhëheqësin politik e nxjerrin “zbuluar”.
