Publicisti i mirënjohur shqiptar, Kim Mehmeti ndihet “i pafuqishëm” për t’i dhënë një këshillë Edi Ramës se si mund të mirë-qeverisë vendin.
Ai thotë se se politikanëve të tillë nuk ke çfarë këshillash t’u japësh. “Andaj edhe s’ke çka i sugjeron njeriut që të lë përshtypjen se nuk e ka kuptuar më parësoren që duhet ta dijë një burrështetas: se çfarë i ka hije të bëjë e të thotë budallai i mëhallës, nuk i ka hije të parit të shtetit…”.
Në një intervistë për gazetën ‘Koha Jonë”, shkrimtari i suksesshëm i trevave shqip-folëse e konsideron kryeministrin e Shqipërisë si politikanin e fundit të një brezi politik, largimi i të cilit do i hapë rrugë ardhjes së një gjenerate të re, si e vetmja zgjidhje që kjo shqiptari ta shpëtoj vetveten nga përqafimi ngulfatës i burrështetasve të sotëm.
“E kjo do ndodh ditën kur do bie kjo qeveri, e cila do e tërheq me vete një kastë politike, e cila thuajse tri dekada me radhë mbolli farën e bimës së keqe politike, për to cilën u fola më lartë”, shprehet i bindur Kim Mehmeti.
Ai e konsideron Edi Ramës si fytyra më besnike e politikanëve që Shqipërisë ia morën të gjitha, duke mos i dhënë asaj asgjë. “Pra ai është portreti më besnik i një klase politike që thuajse tri dekada me radhë e sunduan vendin, por duke mos mundur t’i sundojnë pirjet e tyre destruktive, pra duke e humbur pushtetin mbi vetveten”.
Analisti Mehmeti bën një rezyme të jetës politike shqiptare në një mënyrë shumë lakonike.
Për të, elitat politike shqiptare pasqyrojnë edhe kulturën dhe mendësinë tonë kolektive politike, sepse të zgjedhurit e një populli janë edhe fytyrat e zgjedhësve të tyre.
“Politikanët tanë janë ‘prodhim’ i shoqërive në të cilat politika është ‘biznesi’ më fitimprurës. Dhe ku pushtetmbajtësit përjetohen si pronarë të shtetit, të cilët të japin aq sa duan dhe kur të duan, por edhe marrin sa të duan dhe pa pyetur askënd”!
Problemin më të madhe të politikanëve shqiptarë, publicisti Mehmeti e sheh tek sjellja anti-demokratike e bashkimit të partisë me shtetin, një mendësi që shkatërron shtetin dhe nuk e ndërton atë.
“Shkurt e shqip, në të gjitha ‘Shqipëritë’ tona ndodhi thuajse e njëjta: patriotizmi dhe çdo gjë që ka të bëjë me shqiptarinë, u barazua me interesat partiake. Pra libreza partiake u bë ‘certifikatë’ mbi gjitha të tjerat. Me çka u partizua çdo gjë e jona, e të cilën më së miri e pasqyrojnë debatet e përnatshme televizive mes ‘mendjendriturve’ tanë, të cilët bëhen copa mes veti, duke mbrojtur parimin se nuk është kriminel dhe hajdut vjedhësi i partisë sime, që më jep edhe mua, por ai i partisë kundërshtare, që vjedh nga unë dhe u jep të vetëve! Mendësi e cila rrënon, e nuk ndërton shtet”, analizon Mehmeti!
Përballë kësaj gjendjeje, Kim Mehmeti ka një sugjerim për zgjidhje, të cilët ua drejton qytetarëve, të cilët janë të vetmit që mund të largojnë këta “burrë-shtetas që përbuzin inteligjencën e popullit.
“Sidoqoftë, ka ardhur koha kur shqiptaria duhet ta shpëtojë vetveten nga këta burrështetas që e përbuzin inteligjencën tonë, duke menduar se ne i kemi ngatërruar ëndrrat për “Shqipëritë” tona dhe se nuk e shohim se ato u bënë vende me institucione të partizuara, me gjyqësor që e zbaton ligjin vetëm ndaj varfanjakut që vjedhë 50 euro për t’i ushqyer fëmijët, por jo edhe ndaj politikanit që e plaçkitë popullin, me sistem të rrënuar shëndetësorë ku vdesin varfanjakët, e ku nuk shkojnë të shërohen burrështetasit e sëmurë, me institucione publike arsimore ku libreza partiake ta siguron edhe titullin shkencor…, se u bënë shtete që shenjë njohëse kanë keqqeverisjen dhe korrupsionin”, thekson analisti dhe publicisti Kim Mehmeti!
