Partia Demokratike do të organizojë dy protesta këtë javë, njërën para Kuvendit dhe tjetrën, 30 mars, në Durrës.
Burime nga PD shprehen se protesta që do të zhvillohet në Durrës, në sheshin para Bashkisë, është kërkesë e vetë qytetarëve dhe strukturave lokale të opozitës, ndërsa i pranishëm do të jetë edhe kreu demokrat Lulzim Basha.
Protesta e së shtunës do të organizohet pasdite, ndërsa opozita do të artikulojë të njëjtat kërkesa, largimin e Edi Ramës nga posti i Kryeministrit, krijimin e një qeverie tranzitore dhe zgjedhjet e parakohshme.
Mësohet se në protestën e së shtunës, pritet të shfaqen instalacione dhe banderola të kryebashkiakut Vangjush Dako, një prej personazheve kryesorë të dosjes 339, ku përfshihen përgjimet lidhur me shit-blerjen e votave në qarkun e Durrësit, në zgjedhjet e fundit parlamentare.
Kjo ka qenë edhe arsyeja kryesore që opozita dorëzoi mandatet e deputetëve dhe nisi një aksion opozitar me protesta deri në largimin e qeverisë Rama.
Ndërkohë protesta e së enjtes para Kuvendit ka lidhje me seancën parlamentare. Opozita ka deklaruar se sa herë Kuvendi të mblidhet në seancë, qytetarët do të thirren në protestë.
