Partia Demokratike ka publikuar dy audio përgjime të tjera, që sipas ish-deputetit Ervin Salianji faktojnë që drejtuesit e policisë në Fier kanë paguar dëshmitarin e rremë Fredi Alizoti.
Në përgjime përmendet “shefi i madh” që sipas Salianjit është Fatmir Xhafaj.
“Sot po publikojmë dy përgjime të tjera që faktojnë që jo vetëm drejtuesit e policisë në Fier paguajnë dëshmitarin e sajuar Fredi Alizoti, por që ai që e ka deleguar ‘qepjen’ e kësaj afere është ai që në bisedë quhet shef i madh dhe që faktet konkrete tregojnë që ai është Fatmir Xhafaj.
Këto biseda mes Drejtorit të Policisë së Fierit dhe dëshmitarit të sajuar janë zhvilluar në datat 7 dhe 8 qershor 2018. Në këto data, është e vërtetë se shefi i madh i policëve ndodhet jashtë shtetit. Sipas të dhënave zyrtare të Ministrisë së Brendshme, shefi i madh, Fatmir Xhafaj, ndodhet në Kroaci, në një vizitë zyrtare”, tha Salianji.
