Nga Boldnews.al
Partia Socialiste është duke zhvilluar “Paradën e sukseseve” të qeverisë së Rilindjes, duke iu fshehur në mënyrë të turpshme problemeve galoponte me korrupsionin, lidhjet me krimin e organizuar, blerjen e zgjedhjeve dhe “pushtimin” e sistemit të drejtësisë.
Disa nga ministrat e qeverisë së Edi Ramës po shfaqen në rolin e “aktorëve”, duke renditur arritjet e tyre. Folësit, pavarësisht specifikave të tyre, bashkohen në dy pika të përbashkëta: bëjnë elozhe për “liderin suprem” dhe iu shmangen përgjegjësive.
Ministrja e Drejtësisë, Etilda Gjonaj, raportoi me shifra para Kongresit elektoral të Partisë Socialiste për luftën “e suksesshme” në luftën kundër korrupsionit. Ajo e cilësoi Reformën në Drejtësi si një arritje madhore të qeverisë së Edi Ramës.
Ministrja Gjonaj nuk tha asnjë fjalë për skandalin e dosjes “339”, ku korrupsioni dhe bashkëpunimi me krimin e organizuar janë ndërthurur për t’i siguruar pushtetin ‘Rilindjes”. Gjonaj nuk përmendi asnjë fjalë për skandalin e Unazës së Re, në të cilën institucionet qëndrore shtetërore u përfshinë në një skemë skandaloze multi-miliona euro të korrupsionit.
Ministrja e Infrastrukturës, Belinda Balluku, foli për arritjet e Shqipërisë nën drejtimin e Edi Ramës. Foli për investimet në energji, duke mos harruar të përsërisë gënjeshtrën e uljes së çmimit për qytetarët.
Balluku foli për përfundimin e pritshëm, më në fund, të rrugës Tiranë-Elbasan. Foli për premtimin e përsëritur të Rrugës së Arbrit dhe…kaq. Ministrja kaloi tek transporti ajror. Nuk tha asnjë fjalë për “projektin e rëndësishëm” të Unazës së Re. Nuk përmendi dhe, dukshëm nuk e ka aspak shqetësim që qindra qytetarë protestojnë çdo ditë, për gati 4 muaj, tek kjo zonë e rëndësishme e kryeqytetit.
Balluku foli edhe për transportin ajror, duke e shitur si sukses projektin në letër të ‘Air Albania”.
Pas Ballukut, ishte radha e Ministres së Shëndetësisë, Ogerta Manastirliu të shprehte elozhet e saj për “liderin” Edi Rama. Manastirliu foli për investimet në Shëndetësi, duke mos përmendur në asnjë rresht të fjalës së saj mungesën e ilaçeve, kushtet skandaloze spitalore në qendrat e rëndësishme universitare e në strukturat shëndetësore lokale.
Besa Shahini, ministrja e Arsimit, nuk guxoi të përmendte protestën shembullore të studentëve. Ajo kishte falënderime për Edi Ramën dhe paraardhësen e saj, Lindita Nikolla, dy njerëzit përgjegjës për ligjin e dështuar të Arsimit të Lartë, që nxiti revoltën e të rinjve studentore. Shahini, natyrisht, nuk e përmendi aspak faktin se “Pakti për Universitetin” i qeverisë ishte një mashtrim, i kamufluar me fjalë të bukura.
Blendi Klosi i Turizimit kishte zgjedhur që të fliste me pathos poetik për arritjet e ‘Rilindjes” dhe të Edi Ramës. Nuk kishte asnjë fjalë për mungesat e investimeve strategjike në Turizëm, nuk përmendi as se përse investitorët e huaj nuk i qasen aspak Shqipërisë, por paratë e tyre i përdorin në Mal të Zi, Maqedoni…
Elva Margiriti, ministrja e Kulturës që foli për herë të parë në një forum të lartë socialistësh, nuk kishte asnjë fjalë për ligjin korruptiv dhe skandaloz që lejon prishjen e Teatrit Kombëtar për ndërtimin e një kompleksi gjigand kullash në qendër të Tiranës.
