Nuk ka asnjë arsye pse vendi duhet të shkojë në zgjedhje të parakohshme. Është ky vlerësimi që bën Sertvet pëllumbi, një prej figurave të vjetra në Partinë Socialiste, i cili pas largimit nga politika aktive, arriti që djalin e tij, ta përfshijë në listat e deputetëve të kësaj partie.
I njohur ndryshe në rrethet e së majtës si “profesori i socialistëve”, Pëllumbi ka komentuar situatën politike në vend, ndërsa Partia Socialiste ka mbledhur Kongresin elektoral.
“Sa i takon situatës, une mendoj se nuk ka ndonjë gjë të jashtëzakonshme, këto situata ndodhin edhe në vende të tjera, pershembull, jelekverdhët në Francë kanë 5 muaj dhe Macroni vazhdon punën i qetë. Ata kanë të drejtë të protestojnë, kur e teprojnë shteti vepron me mjetet që i lejon ligji. Në Shqipëri nuk janë jelekverdhë, biles edhe jeleku antiplumb i Berishës është vjetëruar”, tha Pëllumbi
Pëllumbi thekson se nuk ka asnjë arsye pse bëhen zgjedhje të parakohshme, pasi Kushtetuta është shume e qartë, zgjedhjet bëhen një herë në 4 vjet dhe mund të bëhen zgjedhje të parakohshme kur humbet mazhorancës qeverisëse, nuk qeveris dot dhe nuk miraton dot një ligj.
Madje, Pëllumbi mendo se zgjedhjet vendore mund të bëhen edhe pa opozitën, nëse ajo nuk merr pjesë në proces.
“Mirë është të jetë opozita, por opozita nuk janë ata që dalin e rrethojnë parlamentin, opozita është atje poshtë tek populli. Këto janë zgjedhje administrative, i zgjedh populli për hallet e veta, marrin nuk marrin pjesë forcat politike populli do votojë të zgjedhë përfaqësuesit e vet, qofshin të pavarur apo partiake”, tha ai.
Profesori i socialistëve është treguar i matur lidhur me deklarimet e bëra nga Presidenti Ilir Meta, me të cilin për vite me rradhë kanë bashkëpunuar si drejtues të PS-së.
“Deklaratat që kanë panik nuk komentohen”, tha Pëllumbi.
