Fatos Nano, lideri historik i socialistëve, do të jetë prezent nesër në Kongresin e forcës politike që drejtoi deri në 2005, kohë kur u tërhoq pas humbjes së zgjedhjeve parlamentare.
Zyrtarisht mësohet se Nano ka konfirmuar pjesëmarrjen, ndërkohë nuk dihet nëse ai do të drejtohet me një mesazh politik të pranishmëve, apo thjesht do të jetë si një figurant në një sallë të mbushur me anëtarë, punonjës të administratës, G 99, Mjaft, të gjithë këta të shndërruar në Rilindas.
Nano u tërhoq në 2005 nga drejtimi i PS-së, për ti lënë vendin një gare brenda kësaj partie, ku pas një kongresi 2 ditor me shumë hije, u zgjodh si kryetar i kësaj partie, Edi Rama, kryeministri aktual.
Më pas Nano tentoi të paktën dy herë për t’i hyrë garës për t’u zgjedhur President, por asnjëherë nuk arriti të marrë mbështetjen e partisë që vetë themeloi dhe drejtoi për të paktën 14 vjet.
Herë pas here ai ka përcjellë mesazhe që është pjesë e politikës aktive, edhe pse nuk ka qenë prezent në Shqipëri.
Deklarata e fundit e Nanos është ajo e një viti më parë, kur merrte pjesë si i ftuar në një ceremony në kujtim të luftëtarëve të UÇK-së, ku u shfaq në krah të Ali Ahmetit.
Në atë kohë Nano deklaronte se nuk ishte tërhequr asnjëherë nga politika, por shtoi se nuk ishte pjesë në politikën e kulisave të Tiranës.
Nuk dihet nëse pas 1 viti, lideri historik i socialistëve ka ndryshuar apo jo qëndrim, veçanërisht përsa i takon politikës së kulisave.
Ajo që dihet është fakti se nesër Nano do të jetë në Kongresin e socialistëve, pjesë e të cilëve kanë mbetur Gramoz Ruçi, Musa Ulqini dhe Pandeli Majko, ndërsa drejtuesit e tjerë të PS, përfshi këtu Erjon Veliajn dhe Elisa Spiropalin, i përkasin lëvizjeve që hidhnin letra higjenike dhe vezë ndaj Kryeministrisë që drejtohej nga lideri historik i PS-së.
