Nga Boldnews.al
E shtuna në Tiranë është festë për Bashkinë dhe sfidë për Lali Erin, që nën delirin se mundi të mposhte kryeministrin Rama, (ky i fundit u detyrua ta rikandidonte), tashmë si personazh gërricës, tenton të nxisë si gjithnjë urrejtje ndaj opozitës, duke “ftuar” Bashën e Berishën të dalin para tij si sfidantë.
Nga ana tjetër, ai kërkon bollëk, masivitet qytetarësh në ditën e shpalljes së kandidaturës së tij. Si maniak i propagandës, njëkohësisht tenton të sfumojë edhe Kongresin e PS-së që pritet të diskutojë pikërisht për zgjedhjet lokale, po të shtunën. Ushqimin që u servir njerëzve është festa, imazhi, virtualiteti dhe mashtrimet e mandatit të dytë.
Përveç daljeve publike dhe sms-ve telefonike, Veliaj dje kishte urdhëruar shtypjen e qindra mijëra broshurave dhe të shpërndaheshin në çdo derë të apartamenteve, ku u bën thirrje qytetarëve që të marrin pjesë masivisht në prezantimin e tij dhe të kandidatëve të këshillit bashkiak për Tiranën. Por diçka e mundon dhe kjo nuk është pak. Opozita me gjasë nuk do marrë pjesë në zgjedhjet lokale dhe Lali Eri do realizonte një fitore pa asnjë lavdi.
“Nuk mund të hedh unë kandidatët kundërshtarë. Nëqoftëse ata mendojnë që më të mirët që kanë janë Saliu me Lulin, le të vijnë të dy bashkë, njëri të kandidojë për kryetar, njëri për kryetar këshilli, duke qenë se tani janë dhe të papunë, janë dhe pa mandat deputeti, kështu që janë të lirshëm”-tha Veliaj në një deklaratë publike në media.
Padyshim që në situatën aktuale që po kalon vendi me një opozitë të dalë jashtë institucioneve dhe me protestat masive në rrugë, Lali Eri po bën rolin e një sfidanti të dështuar, në kërkim të kundërshtarëve.
E gjitha mbetet një lojë dhe tymnajë që vetëm një mendje e ndërtuar nga mekanizmi propagandistik mund ta bëjë. Në çdo vend normal, një drejtues bashkie matet me premtimet e dhëna dhe sa prej tyre ka realizuar, por këtij debati jetësor, ky personazh i ngjizur në organizatën “Mjaft” dhe i pompuar fort nga kryeministri Edi Rama, kërkon ti shmanget me dredhi.
“Nuk do ta betonizoj Tiranën, kryeqytetit do i rikthej frymëmarrjen”. Kjo ka qenë moto e fushatës elektorale të Veliajt në vitin 2015. Por pak muaj pasi mori bashkinë e kryeqytetit, iu kthye avazit të vjetër, të trashëguar, e tashmë edhe tejkaluar nga “babai politik” Edi Rama.
Tirana sot është në ditët e saj më të erreta për ndërtimet e shumta të pallateve, qendrave tregtare dhe kullave shumëkatëshe, ku këta të fundit po mbijnë mes zonës më të preferuar të Tiranës, në të dy anët e bulevardit “Dëshmorët e Kombit”.
Për të zymtësuar çdo debat të tillë mbi ndërtimet, Veliaj po përdoruar televizionet e mëdha kombëtare e lokale, për propagandën e tij. Madje, “bosët e mediave” vizive, janë aq të zellshëm sa gazetarëve nuk ua lenë mundësinë të “vetecensurohen”, por i censurojnë haptas duke i kërcënuar se asnjë koronikë nuk duhet të transmetohet kundër Erion Veliajt.
Çuditërisht këtë fuqi nuk e ka as vetë Edi Rama. Ai Lali Eri që shiste fiq në vogëli, sot ka krijuar orligarkët e tij, pas çdo tenderi të madh e të vogël fshihet një aferë, që gjithnjë kamuflohet, me ndihmën e artilerisë së rëndë mediatike televizive.
