Nga Boldnews.al
Prokurori i Durrësit Bledar Bejko, i cili nuk mori nën hetim Jurgen Kurtin, i vrarë në fillim të kësaj jave, për një episod të dhunshëm ku mbeti i vdekur Agim Arapi në vitin 2017, është një personazh i përmendur disa herë në kronika investigative mediatike.
Vjollca Arapi, bashkëshortja e Agim Arapit, e ka akuzuar publikisht prokurorin Bejko, por edhe policinë e gjykatën e Durrësit të cilët, sipas saj, nuk e arrestuan Jurgen Kurtin, pasi “ata janë korruptuar”.
Jurgen Kurti u vra në një atentat mbrëmjen e së Hënës dhe policia ka si të dyshuar djalin e Agim Arapit, shtetasin Dervis Arapi. Ky i fundit, ashtu si edhe nëna e tij, Vjollca Arapi, e mohuan përfshirjen në atentatin ndaj Kurtit. Por, gjithësesi, deklaratat e tyre duhet të përballen me hetimet e policisë dhe prokurorisë së Tiranës.
Prokurori Bejko nuk e ka për herë të parë që përballet me akuza publike. Në mesin e vitit 2018, emisioni investigativ ‘Fiks Fare” publikoi rastin e Lorenc Bajramit, i cili kishte kallëzuar në Dhjetor 2017 bashkëjetuesen e tij për “vjedhje”.
Rastin e ndoqi prokurori Bejko. Deri në muajin Maj 2018, denoncuesi Bajrami nuk mori asnjë informacion se çfarë kishte ndodhur me kallëzimin e tij. Ai paraqitet në Prokurorinë e Durrësit, në të cilën sorollatet pa asnjë përgjigje. Në një komunikim me prokurorin Bejko, ky i fundit i thotë kallëzuesit se rastin po e ndiqte një oficer i Policisë Gjyqësore.
Por, pasi u zbuluan dokumentat zyrtarë, rezultoi se prokurori Bejko kishte vendosu mosfillimin e procedimit penal që në Shkurt 2018, pra rreth 3 muaj para se denoncuesi Lorenc Bajramaj të interesohej për ecurinë e hetimit.
Ndërkohë, në vitin 2016, një biznesmen nga Fieri, Nuredin Suli, ka kritikuar publikisht prokurorin Bejko, pasi kishte mbajtur pa veprime, për thuaj 6 muaj dosjen hetimore të vrasjes së vëllait të tij.
Suli, një biznes në hidrokarbure, i shpëtoi një atentati në vitin 2016, gjatë kohës që po ndiqte procesin për vrasjen e vëllait të tij. Pasi i shpëtoi fatmirësisht atentatit, biznesmeni Suli deklaroi publikisht dyshimet e tij për korrupsion në sistemin e drejtësisë gjatë hetimit për vrasjen e të vëllait.
“U interesova personalisht për ecurinë e procesit në prokurorinë Fier në kohën që prokuror i çështjes ishte Bledar Bejko. Ky e mbajti çështjen për 6 muaj”, deklaroi ndër të tjera biznesmeni Suli në atë kohë për median.
“Boldnews.al” publikoi të Mërkurën pjesë nga qëndrimi i prokurorit Bejko në çështjen e vdekjes së Agim Arapit, në prillin e vitit 2017.
Pas një konflikti të ashpër fizik me shtetas Jurgen Kurti, Kujtim dhe Kostandin Ekonomi, vdes shtetasi Agim Arapi. Pas ngjarje, Policia referoi për “vrasje me dashje” vetëm dy vëllezërit Ekonomi, duke mos inkriminuar Jurgen Kurtin.
Bashkëshortja e viktimës, akuzoi, ndër të tjerë edhe prokurorin e çështjes, për hetim të paplotë.
Pas ri-sjelljes në vëmendje të publikut për këtë rast të vitit 2017, në mbrojtje të prokurorit u shfaq publikisht Çerçiz Loloçi, ish-sekretari i Fatmir Xhafajt, në kohën kur ka qenë Sekretar i Rinisë së Partisë së Punës së Shqipëri, në periudhën 1985-1990, sipas deklarimeve të Ilir Demaliajt, personazh me prezencë permanente publike.
Çerçiz Loloçi shkruante, në mbrojtje të prokurorit, se shkrimi i “Boldnews.al” ishte “fake news”. Në bazë të legjislacionit shqiptar, nëse një lajm është apo jo “fake news”, e përcakton gjykata, ku akuzuesi ka barrën e provës për të provuar pretendimin e tij.
