Miliana Muça është gjyqtarja e zgjedhur me short që do të marrë në shqyrtim dosjen e Prokurorisë ndaj ish-ministrit të Brendshëm, Sajmir Tahiri, në fazën paraprake.
Pas përcaktimit të gjyqtares, pritet caktimi i një date se kur do të zhvillohet seanca e parë, në të cilën do të përcaktohet nëse do të nisë gjykimi ose jo ndaj Tahirit.
Avokatët e ministrit të Brendshëm kanë deklaruar se do të kërkojnë pushimin e çështjes me pretendimin se në dosjen e prokurorisë nuk ka prova.
Ndërkohë që organi i akuzës ka përgatitur një dosje me 50 fashikuj, duke ngritur edhe 4 akuza të rënda ndaj ish-ministrit të Brendshëm.
Prokuroria zgjati hetimet ndaj Tahirit për rreth 1 vit, duke kërkuar herë pas here shtyrjen e tyre, ndërsa ka mbledhur të dhëna edhe nga vendet fqinje mbi lëvizjet e Tahirit gjatë kohës që ishte ministër i Brendshëm.
Prokuroria për Krime të Rënda e ka marrë të pandehur Tahirin për akuzën e “Trafikimit të lëndëve narkotike” në kuadër të grupit të strukturuar kriminal. “Pjesëmarrje në grup të strukturuar kriminal”, “Kryerje e veprave penale në kuadër të grupit të strukturuar kriminal” dhe “Korrupsion pasiv i funksionarëve të lartë”.
