Kreu demokrat, Lulzim Basha, ka nisur turin e takimeve me qytetarët në Korçë, ku shoqërohet nga ish-deputetët e PD-së në këtë qark.
Në takimet me qytetarët, Basha është njohur me problemet e qytetarëve, të cilët i janë ankuar për gjobat e larta që u vendosen bizneseve të vogla dhe për largimin e të rinjve.
“Gjendja e biznesit ka ardhur duke u përkeqësuar në këto tre vitet e fundit, pasi janë rritur taksat, është rritur çmimi i naftës dhe ka rënë fuqia e blerjes. Do të heqim taksën Rama mbi naftën, duke ulur çmimin me 300 lekë për litër.
Kjo do të thotë se çdo njeri që ka një makinë, do të kursejë 30 mijë lekë në muaj, çka do të thotë se kjo shumë do të mund të përdoret për të blerë gjëra të tjera”, tha Basha, duke shtuar se gjendja ku ndodhet vendi është mbytëse, qytetarët kanë humbur shpresën.
Basha tha se biznesi me xhiro nën 140 milionë lekë të vjetra në vit do të konsiderohet si biznes i vogël, që do të thotë se do të paguash vetëm një taksë dhe në derën e biznesit do të vendoset një pullë që do të ndalojë taksidarët të shkojnë dhe t’I bëjnë presion bizneseve.
Basha i ka bërë thirrje qytetarëve të Korçës që më 16 mars të marrin pjesë në protestën e opozitës.
“Ejani në Tiranë, protestoni kundër një qeverie që është kapur duke ju vjedhur”, theksoi Basha.
Ai shtoi se protesta e 16 marsit është një takim me historinë, ndaj dhe qytetarët duhet të vijnë në Tiranë dhe të protestojnë për ta bërë Shqipërinë si gjithë Europa.
Sipas tij, e gjithë Shqipëria punon për të pasuruar 1 njeri dhe i gjithë shteti funksionon vetëm që të pasurohet 1 njeri.
“Kjo skemë duhet të marrë fund, vendimmarrja duhet të jetë në duart e njerëzve”, tha Basha.
