Për më shumë se 5 orë, 4 familje në zonën e Petro Ninit në Tiranë, mbrojtën banesat e tyre, ndërsa përbaruesit gjyqësorë, të mbështetur nga dhjetra forca policore, që përdorën dhunën edhe ndaj fëmijëve, tentuan t’i nxirrnin jashtë.
Konflikti gjyqësor mes familjeve dhe pretenduesit si pronar i tokës, shkaktoi një përplasje të fortë, ndërsa ajo që të paktën u pranua publikisht nga ministri i Brendshëm, ishte fakti se policia nuk u tregua fleksibël.
Ndërkohë Kryebashkiaku Erjon Veliaj ka sqaruar se nuk ka asnjë lidhje me çështjen e konfliktit mes dy privatëve pranë Shkollës “Petro Nini Lurasi”, as përmes planit të detajuar vendor dhe as me dhënie të lejes së ndërtimit.
“Bashkia Tiranë nuk ka ASNJË përfshirje të PNL, as ka PDV apo leje ndërtimi! Konflikti i pronarëve të tokës me banorët e një ndërtese me shtesa pa leje është trajtuar në GJYKATË! Ata që e politizojnë na kujtojne prej kujt i kemi peshqesh këto gjykata e këto plagë me pronat”, shkruan Veliaj.
Veliaj shpreh gatishmërinë e Bashkisë së Tiranës për të strehuar familjet që preken në banesat sociale të cilat ofrojnë të gjitha kushtet e nevojshme për familjet.
“E megjithatë @BashkiaTirane është gati që SOT t’i ofrojë mbështetje me BANESA SOCIALE në kushte shumë më të mira se katet pa leje të gjithë familjeve të prekura nga ky konflikt mes DY PRIVATËVE për pronat, kontratat e llogaritë e tyre, pavarësisht vendimit të gjykatës! EV”, shkruan Veliaj.
