Kryeministri Edi Rama prej disa javësh ka nisur turin “Bashkia që duam”, ku duket se po shpreh vendimet e tij për kandidatët socialistë në zgjedhjet lokale të 30 qershorit.
Ndonëse është vendosur që më 30 mars të mblidhet kongresi i PS-së, ku do të zyrtarizohen kandidatët për kryebashkiakë, Rama dita ditës po jep mbështetjen për disa prej kryebashkiakëve aktualë, apo promovimin e emrave të rinj, që pritet të zyrtarizohen në fund të muajit.
Kështu pas Erjon Veliajt, që duket se ka marrë mbështetjen e plotë për të kërkuar një tjetër mandat në postin e kryebashkiakut, Rama ka konfirmuar Armando Subashin si kandidaturën e PS-së për Bashkinë e Fierit.
Ish-deputeti socialist mori mandatin e parë në zgjedhjet lokale të 2015, ndërsa në 30 qershor do të kërkojë mandatin e dytë. Po kështu në Vlorë, Rama ka shprehur mbështetjen për Dritan Lelin, që do të kërkojë një mandate të dytë, ndërsa për Durrësin nuk dihet nëse do të ketë mbështetje për Vangjush Dakon, që sot po përballet me akuzat publike, lidhur me dosjen 339. Kandidati rezervë për këtë bashki është Ardian Çela.
Ndërkohë në Korçë, kandidatura që pritet është ajo e kryebashkiakut aktual, Sotiraq Filo, ndërkohë që në Elbasan pritet të kandidohet, Gledian Llatja, që sot mban detyrën e Prefektit. Në Shkodër, emir që pritet të marrë mbështetjen e Ramës është Senida Mesi, deputete e PS-së, e cila përgjatë mandatit të parë qeverisës mbante detyrën e zv.Kryeministres.
Për Bashkinë e Lezhës, një nga kandidatët që mund të konfirmohet është Pjerin Ndreu, aktualisht deputet i PS-së, në këtë qark, ndërsa për Bashkinë e Dibrës pritet të konfirmohet për një tjetër mandate, Muharrem Rama.
Për Bashkinë e Kukësit emir që përflitet dhe mund të zyrtarizohet në fund të marsit, atëherë kur PS do të mbledhë kongresin, është Safet Gjici, ndërsa në Librazhd pritet të rikonfirmohet Kastriot Gurra.
Në Gjirokastër, socialistët do të kërkojnë fitoren me Flamur Golemin, ndërsa në Shijak pritet të kandidohet deputeti Ilir Ndraxhi. Një tjetër deputet që mund të lërë mandatin dhe pritet të kërkojë postin e kryebashkiakut është Ilir Xhakolli, i projektuar për garën në Pogradec.
E njëjta gjë pritet të ndodhë edhe në bashkinë e Kamzës, ku deputeti Rakip Suli, do të kërkojë mandatin e kryebashkiakut.
