Me thirrjet Rama ik, E duam Shqipërinë si gjithë Europa dhe E duam Shqipërinë pa Edi Ramën, qytetarë të Fierit po protestojnë kundër Kryeministrit Edi Rama, ndërsa policia po përpiqet të pengojë protestuesit.
Mbështetës të opozitës janë mbledhur pranë vendit ku pritet të zhvillohet takimi ku do të jetë pjesëmarrës edhe kreu i qeverisë, ndërsa ka pasur disa përplasje mes policisë dhe protestuesve. Policia nuk ka lejuar protestuesit që të ofrohen pranë vendit ku do të mbahet takimi, duke vendosur kordonë, ndërsa protestuesit kanë tentuar të afrohen.
Ish-deputeti, Luan Baçi, kryetar i degës së PD-së në Fier, ka bërë thirrje për të shmangur provokimet, ndërsa akuzoi policinë për incidentet.
‘Ka persona të infiltruar mes protestueve për të krijuar incidente, mos u provokoni”, ka thënë Baçi. Ndërkohë po me mikrofon, policia i ka bërë thirrje protestuesve të shpërndahen, ndërsa protestuesit po përdorin bilbilat dhe vuvuzelat.
