Nga Boldnews.al
Europarlamentarja Monica Macovei “goditi” sërish pasditen e së Martës. Edhe njëherë, si përherë në këto vitet e fundit, rumunia Macovei sulmoi sërish opozitën shqiptare, duke lavdëruar qeverinë e Edi Ramës me fjalët e Taulant Ballës.
Macovei ka dëshmuar një debulesë të veçantë për qeverinë socialiste të Tiranës. Kjo ndjenjë duket se u forcua më shumë pasi europarlamentarja mori kryesimin e Komitetit të Stabilizim-Asociimit BE-Shqipëri, post të cilin e ndan me deputetin nga Librazhdi, Taulant Balla.
Macovei dhe Balla kanë disa gjëra të përbashkëta-janë të dy të majtë, janë të dy ithtarë të Soros, e shohin Edi Ramës si zgjidhje për Shqipërinë. Dhe këto të përbashkëta i lidhin me gjuhët që përdorin-anglisht dhe rumanisht.
Taulant Balla e njeh mirë gjuhën e nënës së Macoveit. Ai ka përfunduar studimet për Drejtësi në Jashi, në veri të Rumanisë. Pasi u kthye në Shqipëri, i mbajti për disa kohë ccantën Fatos Nanos, derisa i ndriti fati me Edi Ramën.
Pasi Balla mori post drejtues, ai ri-aktivizoi miqësitë e vjetra rumune. Dhe këtë e nisi me Macovein e vjetër në politikë.
Europarlamentarja rumune, pasi forcoi lidhjet e saj me Ballën, nisi të shihte realitetin në Shqipëri me ngjyrën rozë të Rilindjes.
Monica Macovei ishte një ndër deputeteve të Parlamentit Europian më aktive në mbështetje të projektit të Edi Ramës për marrjen nën kontroll të Reformës në Drejtësi.
Macovei nuk e kishte aspak problem që të mbështeste draftet e Edi Ramës dhe shpurës së tij për të vendosur nën tutelë gjyqësorin.
Macovei nuk e pa asnjëherë kanabizimin e Shqipërisë. Ajo i besonte Taulant Ballës verbërisht, kur ky i fundit e mohonte në krah të saj se vendi ynë u bë një plantacion gjigand hashashi.
Dhe tani, si përherë, Monica Macovei, shfaqet sërish në krah të qeverisë së Taulant Ballës, që drejtohet nga Edi Rama.
Eurodeputetja Macovei, me shumë mundësi, nuk do të rizgjidhet në Parlamentin e ardhshëm Europian, pas zgjedhjeve të kësaj vere. Nëse ajo do të jetë një qytetare e lirë e pa impenjime, nuk do të jetë aspak surprizë nëse do të interesohet të mësoj për bukuritë e Librazhdit, por edhe të viseve të tjera të Shqipërisë, si turiste.
