Një akuzë e drejtpërdrejtë është bërë sot nga protesta e opozitës para Kuvendit ndaj kryeparlamentarit, Gramoz Ruçi.
Ismet Shala, kandidat i PD-së në Qarkun e Elbasanit, që ka refuzuar mandatin e deputetit, është shprehur se ka qenë i dënuar me 17 vjet në kohën e komunizmit, ndërsa akuzoi Gramoz Ruçin, ministrin e fundit komunist të Brendshëm, sot Kryetar i Kuvendit.
“Unë jam Ismal Shala, kandidat i listës së PD në Elbasan. Jam nga ata protestues të viteve ’90 që shpresuan për një atdhe tjetër, jo për atdheun e komunistëve. Unë u dënova me 17 vjet burg nga gjyqet e komunizmit në 1990-ën. Më dënoi Gramoz Ruçi! Dhe ne të presim nga ai parlament?!
U bëj thirrje të gjithë qytetarëve, të ngrihen, se i ka mbytur fukarallëku, se na ikën fëmijët jashtë dhe s’ka kush të na hedhë një dorë dhe mbi varr. Qytetarë, mos u trembni! Shqipëria është e shqiptarëve!”, tha Shala.
