Kryeministri Edi Rama është nisur sot drejt Italisë, ndërsa nga foltorja e Kuvendit tha se do të sqarojë mediat në vendin fqinj mbi atë që po ndodh në Tiranë.
Rama kishte parasysh protestat e opozitës dhe pasqyrimin që ato kanë në mediat ndërkombëtare, përfshi këtu edhe ato italiane.
Rrjeti televiziv RAI ka transmetuar disa reportazhe nga Shqipëria, që kanë të bëjnë jo vetëm me protestat e opozitës, por edhe me kontaktimin e trafikantëve të drogës dhe armëve në Shijak apo platacionet e kanabisit në jug të vendit.
Sot në mbrëmje, Kreu i Qeverisë, do të jetë prezent në debatin e famshëm “Porta a Porta” të gazetarit Bruno Vespa.
Por në një nga emisionet më të njohura në vendin fqinj, do të jetë prezent edhe kreu i opozitës, Lulzim Basha.
Kjo të paktën njoftohet nga mediat, çka do të thotë se drejtuesit kryesorë të politikës shqiptare, mund të përballen mes tyre lidhur me atë që po ndodh në Tiranë.
“Porta e Porta”, një prej emisioneve më të shikueshme në vendin fqinj, transmetohet 3 herë në javë sipas një formati të ri, ndërsa kriza politike në Tiranë, duket se ka tërhequr maksimalisht vëmendjen e mediave italiane.
