Kryeministri Edi Rama ka përcjellë sot një lajm jo shumë të mirë për policët që kanë një moshë të caktuar.
Duke folur në një aktivitet në Akademinë e Policisë, Rama theksoi se objektet që sot ruhen nga policë privatë, do të merren në ruajtje nga një strukturë e posaçme e Policisë së Shtetit që është ende në fazën e përgatitjes.
Në këtë strukturë do të shërbejnë punonjës të Policisë së Shtetit që arrijnë një moshë të caktuar, të cilët do të zhvendosen në këtë departament për t’u lënë hapësirë të rinjve që t’u bashkohen uniformave blu.
Sipas Kryeministrit, kjo metodë ristrukturimi do të shërbejë për të rregulluar problemin e moshës së lartë në radhët e Policisë së Shtetit.
“Sot ne kemi përmbushur objektivin e vendosur nga një raport i bërë me partnerët disa vite më parë që ne e gjetëm gati për nivelet e pagës, sikundër kemi filluar të adresojmë problemin e moshës dhe të shkollimit. Por patjetër që do të kërkohen disa vite.
Besoj që me një reformë që ministri i Brendshëm po udhëheq dhe me krijimin e një strukture të re që do të jetë strukturë shërbimi e Policisë së Shtetit në formën e një ndërmarrje që do ofrojë shërbim për ruajtjen e objekteve, do të krijohet mundësia për tranzicion të butë për oficerët më të moshuar dhe për të marrë më shumë të rinj, duke iu krijuar më të moshuarve që të vazhdojnë të kenë një pagë dhe duke dhënë kontribut të rëndësishëm në pastrimin e një xhungle të policisë private, që shpeshherë janë thithëse të mëdha të nevojave publike dhe shpeshherë nuk e ofrojnë kurrsesi atë shërbim që mund të ofrojë Policia e Shtetit. Një ndërmarrje moderne që do të sigurojë ata që shkojnë në një moshë të caktuar të vazhdojnë të shërbejnë”, u shpreh kryeministri Edi Rama.
