Federata Shqiptare e Futbollit mund të marrë një vendim ekstrem për të pezulluar kampionarin shqiptar, për shkak të akteve të dhunës në stadium.
FSHF do të mbajë sot në orën 11:00 një konferencë për mediat, ku ndoshta do të kushtëzohet vazhdimi i kampionatit me rikthimin e policisë së Shtetit në ruajtjen e rendit dhe sigurisë në stadiumet shqiptare.
Burime brenda FSHF-së bëjnë me dije se Komiteti Ekzekutiv dhe drejtuesit e federatës po shohin mundësinë që të pezullojnë kampionatin, derisa policia të kthehet në stadium, shkruan Panorama.
Vendimi duket se ka lidhje me rastin e fundit të dhunës ndaj gjyqtarit në ndeshjen Kamza-Laçi.
Deklarata e FSHF-së
“Federata Shqiptare e Futbollit dënon ashpërsisht dhunën e ndodhur sot(dje) në ndeshjen Kamza-Laçi, e vlefshme për javën e 24-t të Kategorisë Superiore. Kjo ngjarje e rëndë ka tronditur sigurinë e garës së futbollit në Shqipëri. FSHF-ja prej muajsh ka kërkuar reagimin e institucioneve të shtetit shqiptar për të zbatuar ligjin dhe për të nxjerrë përpara drejtësisë autorët e skenave të dhunës në stadiumet shqiptare. Ruajtja e rendit dhe sigurisë publike në mjediset sportive është detyrë institucionale e organeve të Policisë së Shtetit, detyrë e cila, siç u evidentua edhe në ngjarjen e sotme, vazhdon të mos kryhet.
Ne dënojmë dhunën, si një fenomen qe jo vetëm cenon rëndë vërtetësinë e garës, por edhe imazhin e lojës. Federata Shqiptare e Futbollit dënon ashpër çdo akt dhune që vjen nga tifozët, zyrtarët, futbollistët apo kushdo tjetër. Ne presim që të gjithë aktorët të bëjnë punën e tyre, ashtu siç u kërkojmë komisioneve që të jenë ekstremisht të ashpër me ata që prishin imazhin, jo vetëm të lojës, por edhe të futbollit shqiptar.
Ne kërkojmë në mënyrë të përsëritur të rishikohet vendimi i nxituar për të larguar përfundimisht policinë nga stadiumet. Në kushtet ku Shqipëria ndodhet, e gjykojmë të pavend. Ky vendim i nxituar cenon rëndë mbarëvajtjen e garës më të ndjekur sportive në Shqipëri”.
