Sazan Guri është një prej emrave në listat shumëemërore të partive të opozitës, në zgjedhjet e fundit parlamentare.
Me dorëzimin e mandateve të deputetëve nga PD dhe LSI, KQZ ka nisur proçedurën për zëvendësimin e të dorëhequrve, ndërsa disa prej kandidatëve kanë pranuar të vijojnë proçesin, duke mos respektuar vendimet politike të forcave që i kanë kandiduar.
Sazan Guri, ambientalist i njohur, ishte një nga kandidatët për deputet në Qarkun e Beratit, por ai sqaron se do të refuzojë të marrë mandatin. Madje, Guri thekson se edhe me flori t’ia shtrojnë rrugën nga shtëpia në Kuvend nuk do të hynte kurrë në një parlament derexhe.
“Më thonë mirë bën që mos të vesh kësaj radhe në Parlament, për një rrogë fundja, do humbasësh edhe një pension……
Dëgjoni or miq!
Edhe nëse kam dashur më parë të vija në Parlament, po përse për rroge do vija? Apo për të vënë në jetë ato që bëj nëpër leksione, nëpër libra e nëpër protesta e kërkesa jo për vete po për ju o Qytetarë.
Apo për të hyre me biznes të vogël e të dilja me supermarket si të tjeret? Fjala e pare, kur filloj e jap mësim me studentët është se nuk i ngjaj të tjerëve.
Edhe në Parlament këtë parim do të mbaja, se nuk i ngjaj të tjerëve, po kur s’më njeh, edhe mund të thuash ndonjë fjalë pune rroge, punë pensioni.
Po sikur të t’ju them, se me flori të ma shtrojnë rrugën nga shtëpia në Kuvend, e nuk do vija kurrë në këtë mesele apo në këtë parlament derexhe”, shkruan Sazan Guri.
