Nesër Komuniteti Mysliman Shqiptar do të zgjedhë drejtuesin e tij të ri. Një ditë para zgjedhjeve është tërhequr nga gara kreu aktual i KMSH-së, Skënder Bruçaj, i cili konsiderohej edhe kandidati favorit.
Arsyet sepse Brucaj u tërhoq nga gara nuk dihen zyrtarisht, edhe pse një prej arsyeve mund të jetë presioni qeveritar mbi të.
Bruçaj, 5 vjet më parë, fitoi garën, ndërsa konsiderohej në atë kohë si një prej emrave që kishte mbështetjen e Erjon Veliajt, kryebashkiakut aktual të Tiranës, dhe që në kohën e zgjedhjeve në KMSH mbante detyrën e ministrit të Mirëqënies Sociale.
Por çfarë ka ndodhur sot?
Ish-deputeti i Partisë Demokratike, Genc Pollo, shkruan në një postim në rrjet mbi presionin kuisling të qeverisë mbi KMSH.
“Presion kuisling i qeverisë mbi Komunitetin Mysliman. Duan të eliminojnë ata që nuk kontrollojnë.
Për t’a servirur kokën e KMSh në sini të argjendtë.
Uroj që asambleja e myftinjve shqiptarë të ruajë dinjitetin, orientimin e të refuzojë cdo kalë troje”, shkruan Pollo.
Ndërkohë rreth 1 vit më parë, gazeta turke “Yeni Akit”, në një artikull të publikuar e akuzon Bruçajn si person të lidhur me organizatën “FETO”, e njohur botërisht si organizata e armikut të përhershëm të Presidentit Erdogan, Fethullah Gulen.
Shkrimi në fjalë kishte për autor Ayhan Demir, i njohur për përqendrimin në tema që kanë të bëjnë me Shqipërinë, dhe flet për raste të dyshuara të korrupsionit duke akuzuar drejtpërdrejt kreun e KMSH-së.
Sipas tij donacionet e dhëna për ndërtime apo restaurime të xhamive në Durrës, Krujë, apo Pezë janë shpërdoruar
“Pozicioni i mëpasëm i Bruçaj, i cili kryente plotësisht të gjithë direktivat që i jepeshin nga FETO ishte Komuniteti Musliman i Shqipërisë. Bruçaj në vitin 2013 u emërua si ndihmës kryetar nga Këshilli i Komunitetit. Vitin në vijim, duke u treguar si kandidat për kryetar në këshillin e përgjithshëm, kaloi në postin e kryetarit për një periudhë katër vjeçare.
Shkaku më i rëndësishëm i këtij lartësimi të shpejtë ishte efektiviteti i organizatës FETO në KMSH dhe vartësia e pakushtëzuar e Bruçaj ndaj kësaj organizate terroriste.
Bruçaj vijoi të paguajë borxhin e mirënjohjes ndaj organizatës FETO e cila i kishte ofruar çdo lloj mundësie pavarësisht se nuk i meritonte.
Detyrën largimit të atyre që nuk ishin militantë të FETO nga KMSH, detyrë e cila kishte nisur në periudhën e Selim Muçës, Skënder Bruçaj e vijoi me përkujdesjen më të madhe. Ata që u përjetuan në myftininë e qytetit të Librazhdit janë vetëm njëra prej këtyre“, shkruan Demir.
Ndërkohë një prej kandidatëve në garë është Ylli Gurra, myftiu i Tiranës. Rreth dy vjet më parë ai u bë protagonist në skenografinë që u vendos në sheshin Skenderbej në Tiranë, ku gjatë faljes së Namazit, u mbulua me një ekran të madh monumenti i heroit Kombëtar.
Në atë kohë pati reagime të shumta, ndërsa Gurra deklaroi se “në aspektin fetar nuk kemi asnjë lloj kompleksi për figurat tona kombëtare aq më tepër në festa të tilla. Në rrafshin fetar nuk ka asnjë lloj pengese në një vend të hapur siç është sheshi ‘Skëndërbej’ për sa kohë monumenti nuk është pengesë fizike për besimtarët e mbledhur aty. Pra nuk ka asnjë lloj pengese për t’u kryer falja”.
Dhe nëse kihen parasysh raportet miqësore mes Kryeministrit Rama dhe Presidentit turk, Erdogan, nuk është e vështirë të kuptohet se nga ka ardhur presioni, nëse ka ndodhur një i tillë…
