Gerti Bogdani, Sekretar për Marrëdhëniet me Jashtë në Partinë Demokratike, shprehet skeptik që delegacioni i Parlamentit Europian, që ishte në një vizitë në Shqipëri, të japë një zgjidhje për krizën politike në vend.
Bogdani theksoi se përveç deklaratave shabllon kundër bojkotit dhe dhunës, kjo vizitë mund t’i shërbejë parlamentarëve europianë për t’u njohur me situatën në terren dhe jo nëpërmjet raportimeve, dhe të dëgjojnë të gjitha palët. Sipas tij, djegia e mandateve duhet të jetë një “kambanë alarmi” për ndërkombëtarët, dhe dakordësinë ata duhet ta arrijnë më parë me kryeministrin, i cili më pas duhet të ulet në tavolinë me opozitën.
Në studion e A2neës, Bogdani ka folur edhe për ata deputetë që shkelin vendimin për mos djegien e mandateve.
Bogdani tha se njëlloj sikundër u veprua me Myslim Murrizin, duhet të veprohet edhe me Rudina Hajdarin, nëse ajo nuk dorëzon mandatin.
“Besoj se standardet duhet të jenë të njëjta. Nuk mund të bëjmë standarde të dyfishta, nuk ka ndryshime midis Rudina Hajdarit dhe Myslim Murrizit në këtë rast”, theksoi Bogdani, duke shtuar gjithsesi që “ajo në dhjetor ishte e gatshme të digjte mandatin”.
