Opozita duket se ka pezulluar zhvillimin e protestës nesër para Kuvendit. Shkak për këtë vendim është fakti se Kuvendi nuk do të mblidhet në seancë plenare.
Gjithsesi burime nga partitë opozitare theksojnë se protesta e rradhës do të jetë në varësi të mbledhjes së Kuvendit nga socialistët.
Lidhur me protestën e 16 marsit, ajo do të zhvillohet para Kryeminisrisë dhe pritet të jetë protesta e 3-të e madhe që organizon opozita e bashkuar brenda 1 muaji.
Gjatë pasdites së djeshme, qytetarët iu përgjigjen thirrjes së opozitës për të protestuar, ndërkohë që Gramoz Rucci kishte vendosur të mblidhte Kuvendin në një seancë plenare.
Disa mijëra qytetarë qëndruan për më shumë se 3 orë para godinës parlamentare, ku nuk munguan përplasjet me policinë. Kjo e fundit përdori gazin për të shpërndarë protestuesit, ndërkohë që në gadishmëri ishin edhe makinat me ujë që zakonisht përdoren kundër turmave.
Protesta e opozitës u organizua brenda pak orësh, ndërsa kreu demokrat Lulzim Basha në përfundim të saj, tha se mosbindja civile do të shtrihet nga veriu në jug. Basha akuzoi policinë për gazin e hedhur ndaj protestuesve, ndërsa e cilësoi si policia që i shërben krimit dhe përfaqësuesve të tij në Kuvend.
