Kuvendi i Shqipërisë ka shkelur Kodin Zgjedhor në lidhje me procedurën e lënies së mandatit të deputetëve të opozitës. Ndryshe nga çfarë parashikon Kodi, Kuvendi iu drejtua menjëherë KQZ-së.
Neni 164 i Kodit Zgjedhor, i ndryshuar më 2015, përcakton se deputeti, i cili ka vendosur të dorëzojë mandatin e tij, duhet të thirret në Këshillin e Mandateve dhe Imunitetit dhe të deklarojë publikisht vendimin e tij.
“Ndërprerja e mandatit dhe zëvendësimi i vakancës. 1. Mandati i deputetit, i fituar sipas neneve 162 dhe 163 të këtij Kodi, ndërpritet vetëm për shkaqet e parashikuara në nenin 71 të Kushtetutës. Nuk përbëjnë shkak për ndërprerje të mandatit marrëveshjet apo deklaratat paraprake individuale apo kolektive për heqje dorë nga mandati. Në rastin e shkronjave “a” dhe “b” të pikës 2 të nenit 71 të Kushtetutës, deputeti deklaron në mënyrë publike përpara komisionit përkatës të Kuvendit refuzimin për të bërë betimin ose heqjen dorë nga mandati. Në këtë rast, Kuvendi, jo më vonë se 30 ditë, njofton KQZ-në për krijimin e vakancës”, thuhet në pikën 1 të nenit 164 të Kodit Zgjedhor.
Por Kuvendi i Shqipërisë nuk e ndoqi këtë procedurë. Këshilli i Mandateve dhe Imunitetit nuk u mblodh për të marrë në shqyrtim këtë vendim të deputetëve të opozitës, dhe pse në këtë këshill maxhoranca krijon shumicën. Kuvendi i Shqipërisë, pa kaluar as 24 orë nga depozitimi i kërkesave të deputetëve të opozitës për të lënë mandatin, ia përcolli Komisionit Qendror të Zgjedhjeve krijimin e vakancave me kërkesën për zëvendësimin e tyre. Precedenti i fundit i dorëzimit të mandatit ka qenë ajo e deputetit të PDIU-së, Bujar Muça, i cili dy muaj pasi mori mandatin, e dorëzoi atë për arsye familjare.
Edhe për këtë rast, Parlamenti nuk mblodhi Këshillin e Mandateve dhe Imuniteteve, por i kaloi menjëherë kërkesën Komisionit Qendror të Zgjedhjeve për ta zëvendësuar Muçën, pa i dhënë mundësi atij që të deklaronte publikisht vendimin për lënien e mandatit. Katër deputetënuk kanë lënë mandatin, demokratët Rudina Hajdari dhe Myslim Murrizi dhe deputeti i LSI-së Lefter Koka, si dhe demokristiani Nard Ndoka.
Koka dhe Murrizi deklaruan arsyet pse nuk e lenë mandatin, duke kërkuar të përfaqësojnë në Kuvend zgjedhësit e tyre. Ndërkaq, Kuvendi i Shqipërisë ka pastruar faqen e tij nga deputetët e opozitës që kanë depozituar lënien e mandatit.
Në Grupin Parlamentar të LSI-së figuron vetëm deputeti Lefter Koka, në Grupin Parlamentar të PD-së figurojnë vetëm deputetët Rudina Hajdari dhe Myslim Murrizi. Po ashtu, nga komisionet parlamentare janë fshirë të gjithë deputetët e opozitës anëtarë të tyre.
KODI ZGJEDHOR
NENI 164
Ndërprerja e mandatit dhe zëvendësimi i vakancës 1. Mandati i deputetit, i fituar sipas neneve 162 dhe 163 të këtij Kodi, ndërpritet vetëm për shkaqet e parashikuara në nenin 71 të Kushtetutës. Nuk përbëjnë shkak për ndërprerje të mandatit marrëveshjet apo deklaratat paraprake individuale apo kolektive për heqje dorë nga mandati. Në rastin e shkronjave “a” dhe “b” të pikës 2 të nenit 71 të Kushtetutës, deputeti deklaron në mënyrë publike përpara komisionit përkatës të Kuvendit refuzimin për të bërë betimin ose heqjen dorë nga mandati. Në këtë rast, Kuvendi, jo më vonë se 30 ditë, njofton KQZ-në për krijimin e vakancës. /Panorama/
