Mbështetës të opozitës po mblidhen në oborrin e selisë së PD-së, nga ku do të nisë protesta para godinës së Parlamentit.
Protesta pritet të nisë në të njëjtën orë me nisjen e seancës parlamentare, e cila u vendos të mbahet pasditen e sotme, për të zëvendësuar seancën e të enjtes së javës së shkuar.
Ndërkohë pas njoftimit nga Kuvendi, partitë opozitare i kanë bërë thirrje mbështetësve të tyre që të bashkohen në një protestë, ndonëse më parë ishte lajmëruar zhvillimi i tubimit opozitar të enjten.
Policia ka shtuar masat rreth godinës së Kuvendit, ku nuk mungojnë as Forcat e Ndërhyrjes së Shpejtë apo repartet Shqiponja. Gjithashtu në mbështetje të tyre do të jenë edhe efektivët e Gardës, ndërsa punonjësit e policisë janë të pajisur me kundragaz.
Kjo do të thotë se policia apo garda mund të hedhë kundragaz ndaj protestuesve në rast të precipitimit të situatës. Në mbështetje të forcave të sigurisë janë angazhuar edhe automjetet që hedhin ujin për shpërndarjen e protestuesve.
Policia nuk ka dhënë leje për protestën e ditës së sotme .
