Taulant Balla, Sekretar i Përgjithshëm i PS-së, i ka bërë thirrje policisë që të arrestojë personat që përdorën dhunë gjatë protestës së sotme të opozitës para Kuvendit.
I pranishëm në “Dritare me Rudinën”, Balla tha se personat që kanë përdorur dhunë do të identifikohen dhe arrestohen nga policia, ashtu sikundër ndodhi pas protestës së 16 shkurtit.
Balla tha se është e turpshme që nga deputetë të opozitës është bërë thirrje që të sulmohen deputetët e PS-së, duke paralajmëruar se nëse do të ndodhte kjo, atëherë do të jepej përgjigjia e merituar.
Lidhur me përdorimin e gazit lotsjellës që ka dëmtuar edhe qytetarë që nuk kishin lidhje me protestën, Balla theksoi se policia reagoi pasi u godit me mjete që rrezikonin jetën e policisë.
Madje Balla tha se shishet që u hodhën ndaj policisë ishin mbushur me benzinë në selinë e PD-së.
Megjithë deklarimet e Ballës për dhunën që u ushtrua ndaj policisë, ajo që dihet është që në përfundim të protestës nuk pati asnjë polic të plagosur, ndërkohë që dhjetra qytetarë u detyruan të marrin ndihmën e parë nga shërbimet e urgjencës për shkak të përdorimit të gazit.
